(નયના દવે દ્વારા)
Jamnagar તા.૨૯
ઓખા રેલવે સ્ટેશન પર પ્રોહિબીશનની વોચ દરમિયાન રેલવે પોલીસે બે અલગ-અલગ બનાવમાં દારૂ સાથે બે કોચ એટેન્ડન્ટને ઝડપી લીધા હતા. બંને બનાવમાં અલગ-અલગ રીતે કાર્યવાહી કરી દારૂનો મુદ્દામાલ કબજે કરવામાં આવ્યો હતો અને જામનગર રેલવે પોલીસ મથકે ગુના નોંધવામાં આવ્યા છે.પ્રથમ બનાવમાં ઓખા રેલવે સ્ટેશનના પ્લેટફોર્મ નંબર-૧ પર મુંબઈ સેન્ટ્રલ-ઓખા સૌરાષ્ટ્ર મેલ એક્સપ્રેસ ટ્રેન નંબર ૨૨૯૪૫ના કોચ એટેન્ડન્ટ તરીકે ફરજ બજાવતા ઉત્તરપ્રદેશના સોનું કુમાર ચમલાલ, ઉંમર ૩૨,ને શંકાના આધારે રોકી તપાસ કરવામાં આવી હતી. તેની પેન્ટના નેફામાંથી ૧૮૦ મિલીલીટરની સીલબંધ પરપ્રાંતીય દારૂની ત્રણ બોટલ મળી આવી હતી. રૂ.૫૪૦ની કિંમતનો દારૂ કબજે કરી તેની સામે ગુજરાત પ્રોહિબીશન એક્ટની કલમ ૬૫(એ)(એ) તથા ૧૧૬(બી) હેઠળ ગુનો નોંધવામાં આવ્યો હતો.
બીજા અલગ બનાવમાં પણ ઓખા રેલવે સ્ટેશન વિસ્તારમાં રેલવે પોલીસની પ્રોહિબીશનની વોચ દરમિયાન અન્ય એક કોચ એટેન્ડન્ટ વિશાલ રામકિશોર દારૂ સાથે ઝડપાયો હતો. આ બનાવમાં પણ પોલીસે રેલવે કર્મચારી પાસેથી પરપ્રાંતીય દારૂનો જથ્થો કબજે કરી તેની સામે પ્રોહિબીશન હેઠળ કાયદેસરની કાર્યવાહી હાથ ધરી હતી.આમ, ઓખા રેલવે સ્ટેશન પર અલગ-અલગ બનાવમાં દારૂ સાથે ઝડપાયેલા બંને રેલવે કોચ એટેન્ડન્ટ સામે જામનગર રેલવે પોલીસ દ્વારા અલગ-અલગ ફરિયાદ નોંધી તપાસ હાથ ધરવામાં આવી છે.
