Mumbai,તા.૨૨
અક્ષય કુમાર અને અરશદ વારસી સ્ટારર ફિલ્મ ’જોલી એલએલબી-૩’ ની રિલીઝ ડેટ જાહેર થઈ ગઈ છે. ટ્રેડ એનાલિસ્ટ તરણ આદર્શે પોતાની ઇન્સ્ટાગ્રામ પોસ્ટ દ્વારા આ માહિતી આપી છે. દિગ્દર્શક સુભાષ કપૂરની આ ફિલ્મ આ વર્ષે ૧૯ સપ્ટેમ્બરના રોજ સિનેમાઘરોમાં રિલીઝ થશે. આ ફિલ્મમાં અક્ષય કુમાર, અરશદ વારસી, હુમા કુરેશી, અમૃતા રાવ, સૌરભ શુક્લા અને સુશીલ પાંડે મહત્વપૂર્ણ ભૂમિકામાં જોવા મળશે. ફિલ્મનો મોટો ભાગ રાજસ્થાનના અજમેરમાં શૂટ કરવામાં આવ્યો છે. આ કોર્ટરૂમ ડ્રામાના પહેલા બે ભાગ સુપરહિટ રહ્યા છે. હવે કોર્ટરૂમ ડ્રામા સ્ટોરીનો ત્રીજો ભાગ પણ આ વર્ષે રિલીઝ થવા જઈ રહ્યો છે. ચાહકો પણ આ ફિલ્મને લઈને ખૂબ ઉત્સાહિત છે.
જોલી એલએલબી-૩ માં અક્ષય કુમાર અને અરશદ વારસી બંને મુખ્ય ભૂમિકામાં જોવા મળશે. અગાઉ રિલીઝ થયેલા બંને ભાગોમાં રમુજી કોમેડી પણ જોવા મળી હતી. હવે ચાહકોને આ ત્રીજા ભાગ પાસેથી પણ એવી જ અપેક્ષાઓ છે. ઉપરાંત, સૌરભ શુક્લાએ ફિલ્મમાં જજ સુંદરલાલ ત્રિપાઠીની ભૂમિકા ભજવી હતી. આ પાત્ર ખૂબ જ પસંદ આવ્યું. એટલું જ નહીં, લોકોને ફિલ્મના મુખ્ય હીરો કરતાં આ પાત્ર વધુ ગમ્યું. હવે જોલી એલએલબી-૩ ૧૯ સપ્ટેમ્બરના રોજ સિનેમાઘરોમાં રિલીઝ થઈ રહી છે. હવે જોવાનું એ રહે છે કે અક્ષય કુમાર અને અરશદ વારસીની જોડી પડદા પર શું જાદુ બતાવી શકે છે.
દિગ્દર્શક સુભાષ કપૂરે ૨૦૧૩ માં ’જોલી એલએલબી’ નામની ફિલ્મ રજૂ કરી. આ ફિલ્મમાં અરશદ વારસીએ હીરોની ભૂમિકા ભજવી હતી અને બોમન ઈરાનીએ નેગેટિવ ભૂમિકા ભજવી હતી. અર્શદની સામે અમૃતા અરોરા નાયિકા તરીકે જોવા મળી હતી. આ ફિલ્મમાં પણ જજનું પાત્ર સૌરભ શુક્લાએ ભજવ્યું હતું. આ ફિલ્મ બોક્સ ઓફિસ પર સુપરહિટ રહી હતી. બોક્સ ઓફિસ ઈન્ડિયાના આંકડા અનુસાર, ૧૩.૫ કરોડ રૂપિયાના બજેટમાં બનેલી આ ફિલ્મે વિશ્વભરમાં ૪૩ કરોડ રૂપિયાથી વધુની કમાણી કરવામાં સફળતા મેળવી હતી. તેની સફળતા પછી, નિર્માતાઓએ ’જોલી એલએલબી-૨’ બનાવી જે ૨૦૧૭ માં રિલીઝ થઈ. આ ફિલ્મમાં અરશદ વારસીની જગ્યાએ અક્ષય કુમારને મુખ્ય ભૂમિકામાં લેવામાં આવ્યો હતો અને અમૃતા અરોરાની જગ્યાએ હુમા કુરેશીને લેવામાં આવી હતી. જોકે સૌરભ શુક્લાનું પાત્ર બદલાયું નહીં, પરંતુ એક નવો ચહેરો, અનુ કપૂર, વકીલ તરીકે જોવા મળ્યો. આ ફિલ્મ પણ બોક્સ ઓફિસ પર સુપરહિટ રહી હતી. ૮૩ કરોડ રૂપિયાના બજેટમાં બનેલી આ ફિલ્મે વિશ્વભરમાં ૧૮૨ કરોડ રૂપિયાથી વધુની કમાણી કરી હતી.
