New Delhi,તા.૩૧
૫ ફેબ્રુઆરીએ યોજાનારી વિધાનસભા ચૂંટણી પહેલા રાજધાનીમાં આદર્શ આચાર સંહિતાના કથિત ઉલ્લંઘનના ૮૬૦ થી વધુ કેસ નોંધાયા છે. દિલ્હી પોલીસના ચૂંટણી સેલ દ્વારા જાહેર કરાયેલા ડેટા મુજબ, આ કેસ ૭ જાન્યુઆરી, આદર્શ આચારસંહિતા લાગુ થયાની તારીખથી ૨૯ જાન્યુઆરી વચ્ચે નોંધાયા હતા.
આ સમયગાળા દરમિયાન, એક્સાઇઝ એક્ટ સહિત વિવિધ કાનૂની જોગવાઈઓ હેઠળ કુલ ૨૭,૫૫૧ લોકોની ધરપકડ કરવામાં આવી હતી. ચૂંટણી પહેલા, પોલીસે સરહદી ચોકીઓ પર તકેદારી વધારી દીધી છે અને હથિયારો, દારૂ અને ડ્રગ્સની દાણચોરી સહિતની ગેરકાયદેસર પ્રવૃત્તિઓ પર કડક કાર્યવાહી કરી છે. નિવેદન અનુસાર, દિલ્હી પોલીસે એમસીસીના કથિત ઉલ્લંઘનના ૮૬૩ કેસ નોંધ્યા છે અને ૪૧૫ ગેરકાયદેસર હથિયારો અને ૪૭૩ કારતૂસ જપ્ત કર્યા છે. આર્મ્સ એક્ટ હેઠળ ૪૨૬ લોકોની ધરપકડ કરવામાં આવી છે.
અત્યાર સુધીમાં પોલીસે ૯૬,૯૫૭ લિટર દારૂ જપ્ત કર્યો છે અને ૧,૧૪૭ લોકોની ધરપકડ કરી છે. પોલીસે ૭૨.૮ કરોડ રૂપિયાથી વધુ કિંમતના ૧૬૫.૮૭૬ કિલો ડ્રગ્સ અને ૧,૨૦૦ થી વધુ પ્રતિબંધિત ઇન્જેક્શન જપ્ત કર્યા છે અને ૧૫૬ લોકોની ધરપકડ કરી છે. કાયદા અમલીકરણ એજન્સીઓએ ૯.૬૭ કરોડ રૂપિયાની રોકડ અને ૩૭.૩૯ કિલો ચાંદી પણ જપ્ત કરી છે.
