Ahmedabad,તા.૩૦
આવતીકાલે વર્ષ ૨૦૨૪ને વિદાય આપવા અને નવા વર્ષ એટલે કે ૨૦૨૫નું સ્વાગત કરવા માટે અમદાવાદમાં અનેક જગ્યાએ ઉજવણી થશે. ૩૧મી ડિસેમ્બરની ઉજવણી પહેલા અમદાવાદ પોલીસ સજ્જ થઈ ગઈ છે. આ દિવસે કોઈ અનિચ્છનીય ઘટના ન બને અને શહેરમાં કાયદો વ્યવસ્થાની સ્થિતિ જળવાઈ રહે તે માટે અમદાવાદ પોલીસે પ્લાન બનાવી લીધો છે. અમદાવાદ પોલીસે છેલ્લા એક સપ્તાહથી શહેરમાં સઘન ચેકિંગ શરૂ કર્યું છે.
અમદાવાદ શહેરમાં ૩૧મી ડિસેમ્બરની ઉજવણી શાંતિપૂર્ણ રીતે થાય તે માટે પોલીસે એક્શન પ્લાન તૈયાર કર્યો છે. ૩૧મી ડિસેમ્બરની રાત્રે અમદાવાદ શહેરમાં ૬ હજાર પોલીસ જવાનો રસ્તા પર હાજર રહેશે. શહેરના દરેક પોલીસ દીઠ બે વાહન ચેકિંગ પોઈન્ટ પર રહેશે. અમદાવાદમાં કુલ ૧૦૦ જેટલા ચેકિંગ પોઈન્ટ હસે. ૨૦૦૦થી વધુ બોડી વોર્ન કેમેરાથી સજ્જ પોલીસ રસ્તા પર રહેશે.
૩૧મી ડિસેમ્બરની રાત્રે ઘણા લોકો રસ્તાઓ પર નશો કરીને નિકળતા હોય છે. આ માટે પણ અમદાવાદ પોલીસે ખાસ તૈયારી કરી છે. ૨૦૦થી વધુ બ્રેથ એનેલાઇઝર સાથે પોલીસ સજ્જ થઈ છે. જે લોકો ડ્રિંક અને ડ્રાઇવમાં ઝડપાશે તેની વિરુદ્ધ કાર્યવાહી કરવામાં આવશે. અમદાવાદ શહેરમાં ૩૧મી ડિસેમ્બરની ઉજવણી માટે જે જગ્યા પર ભીડ વધારે હોય ત્યાં ડીસીપી કક્ષાના અધિકારીઓ હાજર રહેશે.
અમદાવાદ પોલીસ દ્વારા સિંધુ ભવન રોડ, સરખેજ હાઈવે અને રિવરફ્રંટ પર ખાસ બંદોબસ્ત ગોઠવવામાં આવશે, કારણ કે આ જગ્યાઓએ લોકોની ભીડ વધારે હોય છે. ૩૧મી ડિસેમ્બરની ઉજવણીની પાર્ટી માટે અમદાવાદ પોલીસને અત્યાર સુધી ૧૬ અરજીઓ મળી છે. પાર્ટી આયોજકોએ ગાઇડલાઇનનું ખાસ પાલન કરવાનું રહેશે.
અમદાવાદ પોલીસની ખાસ નજર દારૂ, ડ્રગ્સનો નશો કરી રસ્તા પર નિકળતા લોકો પર છે. પોલીસે આવા નબીરાઓને પકડવા માટે જોરદાર પ્લાન તૈયાર કર્યો છે. પોલીસ દ્વારા ૯ ક્યુઆરટી વાન, ૨૬ સ્પીડગન કેમેરા, ૩૬ ક્રેઇન, ૯૩ પીસીઆર વાન અને ચાર બીડીડીએસની ટીમ તૈયાર કરવામાં આવી છે. એટલે કે શહેરમાં શાંતિપૂર્ણ રીતે ૩૧મી ડિસેમ્બરની ઉજવણી થાય તેનો પ્લાન અમદાવાદ પોલીસે કર્યો છે.
