દારે વધુમાં જણાવ્યું હતું કે, પાકિસ્તાની સેના ભારતના કોઈ પણ દુઃસાહસનો જવાબ આપવા માટે સંપૂર્ણ તૈયાર છે
Islamabad, તા.૨૬
પહેલગામમાં થયેલાં અમાનવીય આતંકી હુમલાંને પાકિસ્તાન સાથે સાંકળવાના ભારતના પ્રયાસોને પાકિસ્તાની સેનેટે એક પ્રસ્તાવ પસાર કરી ફગાવી દીધાં છે. પાકિસ્તાનની સંસદના ઉપલા ગૃહે ભારતના દાવાઓને પાયાવિહોણા ગણાવ્યાં છે. પાકિસ્તાનના નાયબ વડાપ્રધાન ઈશાક દારે આ પ્રસ્તાવ પસાર કર્યો હતો, જેને સર્વાનુમતે બહાલી અપાઈ હતી. પ્રસ્તાવમાં જણાવ્યાં અનુસાર, જળ આતંકવાદ અથવા સૈન્ય હુમલાં સહિતના કોઈ પણ પ્રકારના હુમલા સામે પાકિસ્તાન તેના સાર્વભૌમત્વ અને પ્રાદેશિક અખંડિતતાનું રક્ષણ કરવા માટે સંપૂર્ણ સક્ષમ છે. પ્રસ્તાવમાં પહેલગામ હુમલાને પાકિસ્તાન સાથે જોડવાના તમામ પ્રયાસોને ફગાવી દેતાં જણાવાયું છે કે, નિર્દોષ નાગરિકોની હત્યા પાકિસ્તાનના મૂલ્યોની વિરુદ્ધ છે. ભારત સરકાર દ્વારા પાકિસ્તાનની છબિ ખરડવા માટે ચલાવી રહેલા દુષ્પ્રચારની ટીકા કરતાં તેમાં જણાવાયું છે કે, રાજકીય ઉદ્દેશ્યો પાર પાડવા માટે ત્રાસવાદના મુદ્દાને જાણી જોઈને ચગાવાય છે. ઠરાવમાં સિંધુ નદીના જળને રોકવાના ભારતના નિર્ણયની પણ ટીકા કરી તેને યુદ્ધ સમાન ગણાવ્યું છે.દારે વધુમાં જણાવ્યું હતું કે, પાકિસ્તાની સેના ભારતના કોઈ પણ દુઃસાહસનો જવાબ આપવા માટે સંપૂર્ણ તૈયાર છે. પાકિસ્તાન આવી કોઈ પણ હરકતનો વળતો મજબૂત જવાબ આપશે. દિવસ દરમિયાન દારે ગૃહને માહિતી આપતાં જણાવ્યું હતું કે, વિદેશ મંત્રાલય દ્વારા ૨૬ દેશોના રાજદૂતોને પ્રદેશની વર્તમાન સ્થિતિ અંગે જાણકારી આપી હતી.
