Rajkot,તા.04
રાજકોટમાંથી એસઓજીએ વેરાવળ તાલુકાના ગોવિંદપરા ગામના દિલાવર મહમદભાઈ સુમરા (ઉ.વ.૪૩)ને ર૧ ગ્રામ મેફેડ્રોન ડ્રગ્સ સાથે ઝડપી લીધો હતો. હવે પોલીસે ડ્રગ્સ મંગાવનારને ઝડપી લેવા તજવીજ શરૃ કરી છે.
એસઓજીના પીઆઈ એસ.એમ. જાડેજાને મળેલી ચોકકસ બાતમીના આધારે માધાપર ચોકડીથી અયોધ્યા ચોક તરફ જવાના રસ્તે વોચ ગોઠવી સ્વીફટ કારમાં પસાર થયેલા આરોપી દિલાવરને અટકાવી તેની તલાશી લેતાં ર૧ ગ્રામ મેફેડ્રોન ડ્રગ્સ મળી આવ્યું હતું.
એસઓજીએ તેની કિંમત રૃા.ર.૧૦ લાખ ગણી હતી. એક મોબાઈલ ફોન અને એક સ્વીફટ કાર ઉપરાંત રોકડ રકમ વગેરે મળી કુલ રૃા.૭.ર૧ લાખનો મુદ્દામાલ કબજે કર્યો હતો.
એસઓજીના સૂત્રોએ જણાવ્યું હતું કે આરોપી વેરાવળથી આ ડ્રગ્સનો જથ્થો રાજકોટ આપવા આવી રહ્યો હતો. વેરાવળમાં આરોપીએ કોની પાસેથી ડ્રગ્સ લીધું અને રાજકોટમાં કોને સપ્લાય કરવા આવી રહ્યો હતો તે બાબતે હાલ તપાસ હાથ ધરવામાં આવી છે.
