Gandhinagar,તા.08
અમદાવાદ ગુજરાતમાં પ્રોપર્ટીના ભાવ વધી રહ્યા છે. જેના કારણે સ્ટેમ્પ ડ્યુટી અને નોંધણી ફીની આવકમાં 7 ટકાનો વધારો થયો હતો. એપ્રિલ-ડિસેમ્બર 2025 સમયગાળા દરમિયાન સ્ટેમ્પ ડ્યુટી અને નોંધણી ફીની આવક 13,699 કરોડ પર પહોંચી હતી. જે ગત વર્ષના સમાનગાળા દરમિયાન 12,821 કરોડ હતી.સૂત્રો મુજબ, મિલકત નોંધણીના કારણે થતી આવક નાણાકીય વર્ષ 2025-26માં 19,800 કરોડના બજેટ લક્ષ્યાંકને વટાવી જવાની અપેક્ષા છે. પ્રોપર્ટી ટ્રાન્ઝેક્શનના ઊંચા મૂલ્યના કારણે ચાલુ નાણાકીય વર્ષમાં સ્ટેમ્પ ડ્યૂટીની આવકમાં મોટો ઉછાળો જોવા મળ્યો છે.
સૂત્રો મુજબ, 2023માં સરકાર દ્વારા જંત્રીના દરમાં કરાયેલા 100 ટકા વધારાને બજારે સ્વીકારી લીધો છે, જેની સીધી અસર સરકારની વધેલી આવકમાં દેખાઈ રહી છે. નોંધનીય છે કે નાણાકીય વર્ષ 2024-25માં આ આવક 14,706 કરોડ હતી, જે 2023-24માં 13,731 કરોડ નોંધાઈ હતી.વિવિધ શહેરોમાં જમીનના મોટા સોદા થવાથી આવકમાં મોટો હિસ્સો ઉમેરાયો છે. આ ઉપરાંત RBI દ્વારા રેપો રેટમાં ઘટાડો કરવામાં આવતા હોમ લોન સસ્તી થઈ છે, જેના કારણે ખાસ કરીને નવરાત્રી પછી રેડી ટુ મૂવ મકાનોની માંગમાં વધારો થયો છે. તેમજ અમદાવાદમાં 2030માં કોમનવેલ્થ ગેમ્સના આયોજનની જાહેરાતને કારણે રિયલ એસ્ટેટ સેક્ટરમાં ઉત્સાહ જોવા મળી રહ્યો છે.
સૂત્રો મુજબ, એવી શક્યતા છે કે રાજ્ય સરકાર 2026માં સુધારેલી વૈજ્ઞાનિક જંત્રી અમલમાં લાવશે. આથી, નવા દર લાગુ થાય તે પહેલાં વધુ ને વધુ લોકો નાણાકીય વર્ષના અંત સુધીમાં તેમના પ્રોપર્ટી સોદા પૂર્ણ કરી લેશે, જેનાથી સ્ટેમ્પ ડ્યુટીની આવકમાં હજુ પણ વધારો થશે.રાજયમાં રિયલ એસ્ટેટ માટે જે જંત્રીનો મુદો છે તે પણ લાંબા સમયથી પેન્ડીંગ છે અને સરકાર હવે જંત્રીના સુધારેલા નવા દર કયારે લાગુ કરે તેના પર નજર છે. એક વખત નવી જંત્રી અમલમાં મુકાઈ જાય પછી સરકારની આવકમાં ફરી એક વખત વધારો થશે તેવા સંકેત છે.આ ઉપરાંત ગુજરાતમાં જે રીતે ખેલ મહોત્સવ સહિતના આયોજનો થઈ રહ્યા છે તે પણ નવા નવા બાંધકામને વેગ આપશે. રાજયના ઔદ્યોગીકરણના કારણે સરકાર માટે નવા ઈન્ફ્રા પ્રોજેકટની દરખાસ્ત છે તેના આનુસાંગીક પ્રોજેકટના કારણે પણ સરકારની આવકમાં વધારો થશે.
