ત્રણ દિવસ સુધી યોજાનારી વિવિધ રમત-ગમતની સ્પર્ધાઓમાં ભાગ લેવા માટે તા. ૧૦/૦૯/૨૦૨૬ સુધી એન્ટ્રી ફોર્મ મોકલી શકાશે
(મહેશ રાવલ દ્વારા)
Surendranagar તા.૩૧
રમત-ગમત, યુવા અને સાંસ્કૃતિક પ્રવૃત્તિઓ વિભાગ, ગુજરાત સરકાર, સ્પોટ્ર્સ ઓથોરિટી ઓફ ગુજરાત, ગાંધીનગર અંતર્ગત જિલ્લા રમત વિકાસ અધિકારીશ્રી, જિલ્લા રમત પ્રશિક્ષણ કેન્દ્ર, લીંબડી, જિલ્લા-સુરેન્દ્રનગર દ્વારા ચાલુ વર્ષ ૨૦૨૬-૨૭માં તરણેતર, તા. થાનગઢ, જિલ્લા-સુરેન્દ્રનગર ખાતે યોજાનાર લોકમેળા દરમિયાન તા. ૧૪/૦૯/૨૦૨૬ થી તા. ૧૬/૦૯/૨૦૨૬ એમ ત્રણ દિવસ દરમિયાન ‘‘૨૧મી ગ્રામીણ ઓલિમ્પિક’’નું ભવ્ય આયોજન કરવામાં આવ્યું છે. આ ગ્રામીણ ઓલિમ્પિકમાં વિવિધ વયજૂથ તથા ઓપન કેટેગરીમાં ભાઈઓ અને બહેનો માટે અનેકવિધ રમત-ગમતની સ્પર્ધાઓ યોજાશે.
ગ્રામીણ ઓલિમ્પિકના પ્રથમ દિવસે એટલે કે તા. ૧૪/૦૯/૨૦૨૬ના રોજ ૧૬ વર્ષ સુધીના ભાઈઓ તથા બહેનો માટે ૧૦૦ મીટર દોડ, ૨૦૦ મીટર દોડ, ૮૦૦ મીટર દોડ તથા લાંબી કૂદની સ્પર્ધાઓ યોજાશે. આ ઉપરાંત ઓપન કેટેગરીના ભાઈઓ તથા બહેનો માટે ૧૦૦ મીટર દોડ, ૪૦૦ મીટર દોડ, ૮૦૦ મીટર દોડ, ગોળાફેંક, લાંબી કૂદ તથા ૪ ૧૦૦ મીટર રિલે દોડની સ્પર્ધાઓનું આયોજન કરવામાં આવ્યું છે. ૧૨ વર્ષના બાળકો માટે ભાઈઓ તથા બહેનોની ૯ ખેલાડીઓની ટીમની લંગડીની સ્પર્ધા પણ આ દિવસે યોજાશે.
ગ્રામીણ ઓલિમ્પિકના બીજા દિવસે એટલે કે તા. ૧૫/૦૯/૨૦૨૬ના રોજ ઓપન કેટેગરીની બહેનો માટે ૫૦ મીટર અંતરની માટલા દોડ હરીફાઈ, ૧૦ ખેલાડીઓની ટીમની વોલીબોલ તથા ૧૦ ખેલાડીઓની ટીમની કબડ્ડીની સ્પર્ધાઓ યોજાશે. જ્યારે ઓપન કેટેગરીના ભાઈઓ માટે નારિયેળ ફેંક, ૧૦ ખેલાડીઓની ટીમની વોલીબોલ, ૧૦ ખેલાડીઓની ટીમની કબડ્ડી, સ્ટ્રોન્ગેસ્ટમેન, ખાંડના લાડવા ખાવાની હરીફાઈ તથા સાતોડી (નારગોલ) જેવી વિવિધ સ્પર્ધાઓ યોજાશે.
ગ્રામીણ ઓલિમ્પિકના ત્રીજા દિવસે એટલે કે તા. ૧૬/૦૯/૨૦૨૬ના રોજ ૧૬ વર્ષ સુધીના ભાઈઓ તથા બહેનો માટે દોરડાકૂદ (રોપ સ્કીંપીંગ)ની સ્પર્ધા યોજાશે. આ ઉપરાંત ઓપન કેટેગરીમાં ભાઈઓ માટે કુસ્તી તથા રસ્સાખેંચની સ્પર્ધાઓનું આયોજન કરવામાં આવ્યું છે. કુસ્તીની સ્પર્ધામાં ૪૫થી ૫૫ કિલોગ્રામ, ૫૫થી ૬૮ કિલોગ્રામ તથા ૬૮ કિલોગ્રામથી ઉપરના વજન વર્ગનો સમાવેશ કરવામાં આવ્યો છે. રસ્સાખેંચની સ્પર્ધા ૧૦ ખેલાડીઓની ટીમ માટે યોજાશે.
સ્પર્ધામાં ભાગ લેવા ઇચ્છુક ખેલાડીઓએ અરજી ફોર્મ ભરીને તા. ૧૦ સપ્ટેમ્બર ૨૦૨૬ સુધીમાં જિલ્લા રમત વિકાસ અધિકારીશ્રી, સ્પોટ્ર્સ કોમ્પલેક્ષ, કૃષ્ણાનગર સામે, મીલ રોડ, લીંબડી, જિલ્લા સુરેન્દ્રનગર-૩૬૩૪૨૧ ના સરનામે પોસ્ટ દ્વારા અથવા મતમજ્ઞ-તીયિક્ષમફિક્ષફલફિઽલીષફફિિં.લજ્ઞદ.શક્ષ ઈ-મેઈલ પર મોકલવાના રહેશે. ૧૨ અને ૧૬ વર્ષથી નાની વયના વિદ્યાર્થીઓએ પોતાની શાળાના આચાર્યશ્રીના સહી-સિક્કા કરાવીને જ ફોર્મ જમા કરાવવાનું રહેશે. વધુ વિગતો માટે જિલ્લા રમત પ્રશિક્ષણ કેન્દ્ર, લીંબડીનો સંપર્ક કરવા જિલ્લા રમત વિકાસ અધિકારીશ્રી, સુરેન્દ્રનગરની અખબારી યાદીમાં જણાવાયું છે.
