Mumbai,તા.16
એક સમયની ટીવી ઈન્ડસ્ટ્રીની જાણીતી અભિનેત્રી શ્વેતા ક્વાત્રા લાંબા સમયથી એક્ટિંગ દુનિયાથી દૂર છે અને હાલમાં પોતાના પરિવાર સાથે દુબઈમાં સમય વિતાવી રહી છે. ‘કહાની ઘર ઘર કી’, ‘કુસુમ’ અને ‘ઘર એક મંદિર’ જેવા સુપરહિટ શોઝ દ્વારા ઘરે-ઘરે લોકપ્રિય બનેલી શ્વેતાએ તાજેતરમાં જ એક પોડકાસ્ટમાં પોતાના અંગત અને વ્યાવસાયિક જીવનને લઈને અનેક ખુલાસા કર્યા છે. આ દરમિયાન તેણે ઈન્ડસ્ટ્રીમાં ‘કાસ્ટિંગ કાઉચ’ પર પણ ખુલીને વાત કરી છે અને પોતાના સાથે ઘટેલી એક દર્દનાક ઘટના શેર કરી છે.
શ્વેતા ક્વાત્રા ભલે આજે ઈન્ડસ્ટ્રીથી દૂર હોય, પરંતુ તેનો પતિ અને જાણીતો અભિનેતા માનવ ગોહિલ આ વર્ષની સુપરહિટ ફિલ્મ ‘ધુરંધર’માં જોવા મળ્યો હતો. પોડકાસ્ટ દરમિયાન જ્યારે શ્વેતાને પૂછવામાં આવ્યું કે શું ઈન્ડસ્ટ્રીમાં ખરેખર કાસ્ટિંગ કાઉચ જેવી પ્રવૃત્તિઓ થાય છે? ત્યારે તેણે જણાવ્યું કે, ‘હા, આ બિલકુલ સાચું છે.’
પોતાની સાથે બનેલી આપવીતી શેર કરતા શ્વેતાએ જણાવ્યું કે, ‘મને ઘણીવાર ગંદા અને વિચિત્ર સવાલોનો સામનો કરવો પડતો હતો. કેટલીકવાર લોકો સીધું જ પૂછી લેતા કે શું તમે ‘કોમ્પ્રોમાઈઝ’ કરશો? શરૂઆતમાં મને આ શબ્દનો અર્થ પણ ખબર નહોતી. જ્યારે હું સામેથી પૂછતી કે આનો અર્થ શું છે, ત્યારે તેઓ એવા વિચિત્ર હાવભાવ બનાવતા કે જેથી હું સમજી જાઉં. એ સમયે એક છોકરી તરીકે મનમાં જે ડર પેદા થાય છે, તે હું શબ્દોમાં વર્ણવી શકું તેમ નથી.’
શ્વેતાએ વધુમાં જણાવ્યું કે, ‘એકવાર મને એક ખૂબ જ સારી અને પ્રતિષ્ઠિત હોટેલમાં ઓડિશન માટે બોલાવવામાં આવી હતી. ત્યાં બહાર ઘણા બધા લોકો હોવાથી મને કોઈ અસુરક્ષિતતા ન લાગી, પરંતુ મનમાં થોડો સંકોચ જરૂર હતો. જ્યારે મને અંદર બોલાવવામાં આવી ત્યારે રૂમમાં રાઈટર, ડિરેક્ટર અને પ્રોડ્યુસર બધા હાજર હતા. તેમણે પહેલા મને સ્ક્રિપ્ટ વાંચી છે કે નહીં તે પૂછ્યું અને પછી ચાલીને બતાવવા કહ્યું. મેં બધું કર્યું, પરંતુ તે પછી જે થયું તેનાથી મારા હોશ ઊડી ગયા.’
અભિનેત્રીએ જણાવ્યું કે, ‘તેમણે અચાનક મને કપડાં ઉતારવા (સ્ટ્રિપ કરવા) કહ્યું. મને લાગ્યું કે કદાચ મને સાંભળવામાં ભૂલ થઈ છે, પરંતુ તેમણે ફરીથી એ જ વાત દોહરાવી. જ્યારે મેં પૂછ્યું કે શા માટે? તો તેમનો જવાબ હતો કે અમે જોવા માંગીએ છીએ કે તમે સ્વિમસૂટમાં કેવા લાગશો. આ સાંભળતાં જ હું ખૂબ ડરી ગઈ અને ત્યાંથી તુરંત જ થેન્ક યુ કહીને ભાગી ગઈ.’
તે સમયે કેવું અનુભવાઈ રહ્યું હતું તે અંગે વાત કરતા શ્વેતાએ જણાવ્યું કે, ‘મને એ સમયે અત્યંત ગુસ્સો આવી રહ્યો હતો અને સાથે જ ભયાનક ડર પણ લાગતો હતો. ભલે રૂમની બહાર બીજા ઘણા લોકો હતા, પરંતુ એ બંધ રૂમની અંદર હું સાવ એકલી હતી.’ શ્વેતાના આ ખુલાસાએ ફરી એકવાર ઈન્ડસ્ટ્રીમાં ઓડિશનના નામે થતા શોષણના કાળા સત્યને લોકો સમક્ષ ઉજાગર કર્યું છે.
