Rajkot,તા.૨૦
આજે દશેરાનું પાવન પર્વ છે. નોરતાના પવિત્ર નવ દિવસ દરમિયાન લોકોએ મા ની આરાધના કરી હતી. લોકોએ આ પાવન દિવસો દરમિયાન અલગ અલગ વસ્તુઓની પણ ખરીદી કરી હતી જેમાં વાહનો પણ લોકોએ ખરીદ્યા હતા. ત્યારે રાજકોટ શહેરમાં પણ ટુ વ્હીલર, થ્રી વ્હીલર, ફોર વ્હીલર, સિક્સ વ્હીલરની ખરીદી કરી હતી. રાજકોટ શહેરના લોકોએ નોરતાના નવ દિવસમાં અધધ ૭૫૭,૩૬૨,૮૪૧.૩૫ રૂપિયાના વાહનોની ખરીદી કરી હતી.
આજે દશેરાના દિવસનું પાવન પર્વ છે ત્યારે લોકો વહેલી સવારથી જ અલગ અલગ વાહનોની ખરીદી કરવા માટે અલગ અલગ શોરૂમ ખાતે પહોંચી રહ્યા છે. રાજકોટ શહેરમાં પહેલા નોરતાથી લઈને નવમા નોરતા સુધી હજારો લોકો વાહન ખરીદી ચૂક્યા છે.
૧૧ ઓક્ટોબરથી ૧૯ ઓક્ટોબર સુધીમાં રાજકોટ શહેરમાં હજારો વાહનોની ખરીદી કરી ચૂક્યા છે. જેમાં ૨,૪૮૪ ટુ વ્હીલર, ૪૫૫ ફોર વ્હીલ, ૧૨૭ થ્રી વ્હીલર, ૧ સિક્સ વ્હીલર, ૧ ટ્રેક્ટરની ટ્રોલીની ખરીદી લોકો કરી ચૂક્યા છે. આ વર્ષે નવરાત્રી દરમિયાન લોકોએ કુલ ૩,૦૬૮ વાહન ખરીદ્યા છે. કુલ ૭૫૭,૩૬૨,૮૪૧.૩૫ રૂપિયાના વાહન વેચાયા છે. આજે એક જ દિવસમાં લાખો રૂપિયાના વાહન ખરીદશે.
લોકો વાહન ખરીદવા માટે આજના દિવસની પસંદગી કરતા હોય છે. આજનો દિવસ એ વાહન ખરીદી માટે ખૂબ જ શુભ માનવામાં આવતો હોય છે ત્યારે રાજકોટના લોકો પણ આજના શુભ દિવસે શુભ મુહૂર્તમાં પોતાના પરિવાર સાથે વાહનના શોરૂમ ખાતે પહોંચ્યા હતા જ્યાં નાની દીકરીઓના હાથે વાહનોને કુમકુમ તિલક કર્યું હતું. ત્યારબાદ પોતે જે નવા વાહન ખરીદી રહ્યા છે તેમને ફુલહાર કર્યા હતા, એકબીજાને મોં મીઠા કરાવ્યા હતા. પોતાના આખા પરિવાર સાથે લોકો નવા વાહનની ખરીદી કરવા માટે પહોંચ્યા હતા. રાજકોટના લોકોએ કહ્યું હતું કે તેમણે અગાઉ જ દશેરાના દિવસનું બુકિંગ કરાવ્યું હતું. શુભ મુહૂર્ત, શુભ દિવસ અને શુભ ઘડી પસંદ કરી હતી.
