London તા. 10
ફિફા વર્લ્ડ કપ 2026ના ક્વાર્ટર ફાઇનલ મુકાબલામાં ફ્રાન્સે મોરોક્કોને 2-0થી હરાવીને સેમિફાઇનલમાં પ્રવેશ કર્યો છે. જો કે, મોરોક્કોની આ હાર બાદ બ્રિટનની રાજધાની લંડનમાં જબરદસ્ત હિંસા ફાટી નીકળી હતી. મેચ પૂરી થતાંની સાથે જ મોરોક્કોના નિરાશ અને ગુસ્સે ભરાયેલાં હજારો ફૂટબોલ ફેન્સ લંડનનાં રસ્તાઓ પર ઉતરી આવ્યાં હતાં.
ખાસ કરીને સેન્ટ્રલ લંડનનો વ્યસ્ત એડગવેર રોડ જોતજોતામાં હોબાળા અને હિંસાનાં મેદાનમાં ફેરવાઈ ગયો હતો, જ્યાં ચારેય તરફ ધુમાડાના ગોટેગોટા અને કચરાના ઢગલા જોવા મળ્યા હતા.
આ હિંસક પ્રદર્શન દરમિયાન પશ્ચિમ લંડનમાં એક પોલીસ અધિકારી પર તોફાનીઓના ટોળાએ ઘાતકી હુમલો કર્યો હતો, જેમાં તેઓ ગંભીર રીતે ઘાયલ થયા હતા. સોશિયલ મીડિયા પર વાયરલ થયેલા વીડિયોમાં ઘાયલ પોલીસકર્મી રસ્તા પર બે પોલીસ વાહનોની વચ્ચે પડેલો દેખાય છે અને મેડિકલ ટીમ તેની સારવાર કરી રહી છે.
જ્યારે અન્ય સાથી પોલીસકર્મીઓ ગુસ્સે ભરાયેલી ભીડને રોકવા માટે ચારેય તરફ ઢાલની સુરક્ષા રેખા બનાવીને ઉભા છે. મેટ્રોપોલિટન પોલીસે ભીડને કાબૂમાં લેવા અને આગળ વધતી અટકાવવા માટે એન્ટી-રાઇટ વાહનો અને ખાસ ક્નટેઈનમેન્ટ વ્યૂહરચના હેઠળ રસ્તાની બંને બાજુએ મજબૂત નાકાબંધી કરી દીધી હતી.
માત્ર લંડન જ નહીં, પરંતુ ફ્રાન્સની રાજધાની પેરિસમાં પણ વિજય ઉત્સવની વચ્ચે કેટલીક જગ્યાએ હિંસક ઘર્ષણના અહેવાલો સામે આવ્યાં છે. પેરિસના ‘લેસ હેલ્સ’ વિસ્તારની આસપાસ તોફાની તત્વોનાં ટોળાએ પોલીસનાં વાહનોને ઘેરી લીધાં હતાં.
સોશિયલ મીડિયા પર સામે આવેલાં વીડિયોમાં જોવા મળે છે કે લોકો પોલીસની ગાડીઓ પાસે એકઠા થઈને બૂમો પાડી રહ્યાં હતાં અને મોબાઈલની ફ્લેશ લાઈટો ચાલું કરીને હુમલો કરવાનો પ્રયાસ કરી રહ્યાં હતાં, જેનાં કારણે ત્યાં પણ રાઇટ પોલીસનાં જવાનોએ બોડી આર્મર અને ઢાલ સાથે ભીડને વિખેરવા માટે ભારે જહેમત ઉઠાવવી પડી હતી.
મેચ પહેલાં ફ્રાન્સમાં કોઈ મોટી અનિચ્છનીય ઘટના ન ઘટે તે માટે આખા દેશમાં 20,000 જેટલા સુરક્ષાકર્મીઓ તૈનાત રાખવામાં આવ્યાં હતા, છતાં પેરિસના આંતરિક વિસ્તારોમાં છૂટાછવાયા હિંસક બનાવો બન્યાં હતાં.
લંડનમાં સામાન્ય ઉજવણીનો માહોલ પલભરમાં હિંસક ટકરાવમાં બદલાઈ ગયો હતો અને લોકો પોતાનાં મોબાઈલમાં આ હિંસાના લાઈવ વીડિયો ઉતારતા નજરે પડ્યા હતા. હાલમાં લંડન પોલીસે સમગ્ર વિસ્તારમાં ભારે સુરક્ષાબળ ખડકી દીધું છે, જો કે હજુ સુધી કેટલા લોકોની ધરપકડ થઈ છે તેની ચોક્કસ વિગતો જાહેર કરવામાં આવી નથી.
