Chennai,તા.૨૯
આંતરરાષ્ટ્રીય ક્રિકેટ હોય કે ઈન્ડિયન પ્રીમિયર લીગ, જ્યારે રન બનાવવાની વાત આવે છે, ત્યારે વિરાટ કોહલી કોઈ તક છોડતો નથી. કોહલી, જેણે પહેલાથી જ ઘણા મોટા રેકોર્ડ પોતાના નામે કરી લીધા છે, તે હવે આઇપીએલમાં પણ દરેક મેચ સાથે એક યા બીજી સિદ્ધિ હાંસલ કરી રહ્યો છે.
આઇપીએલ ૨૦૨૫ની પહેલી મેચમાં આવું બન્યું હતું અને બીજી મેચમાં પણ કોહલીએ એક ખાસ રેકોર્ડ બનાવ્યો હતો. ચેન્નાઈ સુપર કિંગ્સ સામેની મેચમાં કોહલીનું બેટ સારું પ્રદર્શન કરી શક્યું ન હતું, છતાં તે આ ફ્રેન્ચાઈઝી સામે સૌથી વધુ રન બનાવનાર ખેલાડી બન્યો હતો. શુક્રવાર, ૨૮ માર્ચના રોજ,આઇપીએલ ૨૦૨૫ની આઠમી મેચમાં ચેન્નાઈ અને બેંગલુરુ એકબીજા સામે ટકરાયા. આ મેચ ચેન્નાઈના હોમ ગ્રાઉન્ડ ચેપોક સ્ટેડિયમમાં રમાઈ હતી. આ મેચમાં બેંગલુરુ પ્રથમ બેટિંગ કરવા ઉતર્યું અને ફરી એકવાર ફિલ સોલ્ટે તેમને તોફાની શરૂઆત અપાવી. જોકે, વિરાટ કોહલીને આ વખતે રન બનાવવા માટે સંઘર્ષ કરવો પડ્યો અને તે પહેલી મેચની જેમ સંપૂર્ણપણે લયમાં દેખાતો ન હતો.
આમ છતાં, વિરાટ કોહલીએ પોતાના નામે એક ખાસ રેકોર્ડ બનાવ્યો હતો. આ મેચ પહેલા કોહલીને ચેન્નાઈ સામે સૌથી વધુ રનનો રેકોર્ડ બનાવવા માટે ફક્ત ૫ રનની જરૂર હતી. પાંચમી ઓવરમાં કોહલીએ એક રન લીધો અને સ્કોર ૫ સુધી પહોંચ્યો. આ સાથે તે ચેન્નાઈ સામે સૌથી વધુ રન બનાવનાર ખેલાડી બની ગયો. કોહલી પહેલા આ રેકોર્ડ દિગ્ગજ ઓપનર શિખર ધવનના નામે હતો, જેણે ૧૦૫૭ રન બનાવ્યા હતા.
જોકે, આ વખતે કોહલી ચેન્નાઈના બોલરો સામે વધુ આક્રમક બેટિંગ કરી શક્યો નહીં. કોહલીને ૧૩મી ઓવરમાં નૂર અહેમદે આઉટ કર્યો હતો. કોહલીએ ૩૦ બોલમાં ૩૧ રન બનાવ્યા અને આ રીતે ચેન્નાઈ સામે તેના કુલ રન ૧૦૮૪ થઈ ગયા છે.
જોકે, આ છતાં, ચેપોક સ્ટેડિયમમાં કોહલીનો રેકોર્ડ કંઈ ખાસ રહ્યો નથી. કોહલીએ આ મેદાન પર ૧૪ ઈનિંગ્સમાં ફક્ત ૪૧૪ રન બનાવ્યા છે. આ મેદાન પર તેની સરેરાશ ફક્ત ૨૯.૫૦ છે, જ્યારે તેનો સ્ટ્રાઇક રેટ ૧૧૦.૪૦ છે.
