Kolkata,તા.૧૦
કોલકાતા નાઈટ રાઈડર્સ ઈન્ડિયન પ્રીમિયર લીગની ૧૯મી સીઝનની ચોથી લીગ સ્ટેજ મેચ લખનૌ સુપર જાયન્ટ્સ સામે તેમના હોમ ગ્રાઉન્ડ, ઈડન ગાર્ડન્સ સ્ટેડિયમ ખાતે રમી રહી છે. આ મેચમાં, ટોસ હારીને પહેલા બેટિંગ કરવાનો નિર્ણય લીધા બાદ કેકેઆરની શરૂઆત નિરાશાજનક રહી. ઓપનિંગ બેટ્સમેન ફિન એલન ઇનિંગના બીજા ઓવરના ચોથા બોલ પર ફક્ત ૯ રન બનાવીને આઉટ થઈ ગયો. થર્ડ મેન પર ફિલ્ડિંગ કરતા દિગ્વેશ સિંહ રાઠીએ તેનો કેચ પકડ્યો, પરંતુ હવે વિવાદ શરૂ થયો છે.
લખનૌ સુપર જાયન્ટ્સના બોલર પ્રિન્સ યાદવ સામે બીજી ઓવરના ચોથા બોલ પર ફિન એલને મોટો શોટ મારવાનો પ્રયાસ કર્યો. બોલ તેના બેટની ઉપરની ધાર પર વાગ્યો અને હવામાં થર્ડ મેન તરફ ગયો. ત્યાં ફિલ્ડિંગ કરતા દિગ્વેશ સિંહ રાઠીએ બોલ કેચ કર્યો, પરંતુ તેનો એક પગ બાઉન્ડ્રી લાઇનની ખૂબ નજીક હતો, જે તેને સ્પર્શતો દેખાતો હતો. જોકે, ઓન-ફિલ્ડ અમ્પાયરે કેચને માન્ય રાખ્યો અને તેને થર્ડ અમ્પાયરને રિફર ન કરવાનો નિર્ણય લીધો. રાઠીએ કેચ લીધા પછી, બાઉન્ડ્રી લાઇન પરનો જાહેરાતનો પડદો પણ થોડો હલતો જોવા મળ્યો.
જો આપણે કેકેઆરના ઓપનિંગ બેટ્સમેન ફિન એલનના કેચ અંગે ઉઠાવવામાં આવેલા પ્રશ્નો પર નજર કરીએ તો, ભૂલ ફિલ્ડ અમ્પાયરની છે જેમણે કેચને રિવ્યૂ માટે થર્ડ અમ્પાયર પાસે મોકલ્યો ન હતો. વધુમાં, જો દિગ્વેશ રાઠીએ કેચ લીધા પછી પેવેલિયન તરફ ચાલતા ફિન એલને અમ્પાયરને થર્ડ અમ્પાયરનો રિવ્યૂ માંગ્યો હોત, તો તે તપાસી શકાયું હોત.
