New Delhi,તા,29
રેસલિંગ ફેડરેશન ઓફ ઈન્ડિયા (WFI) એ દિલ્હી હાઈકોર્ટના એશિયન ગેમ્સ 2026 માટે પસંદગી ટ્રાયલ્સમાં ભાગ લેવાની મંજૂરી આપવાના નિર્ણયને સુપ્રીમ કોર્ટમાં પડકાર્યો છે. જસ્ટિસ પીએસ નરસિંહા અને આલોક આરાધેની બેન્ચ આજે WFIની અરજી પર સુનાવણી કરશે.
22 મેના રોજ, હાઈકોર્ટની બેન્ચે, વિનેશને 30 અને 31 મે, 2026 ના રોજ યોજાનારી એશિયન ગેમ્સ માટે પસંદગી ટ્રાયલ્સમાં ભાગ લેવાની મંજૂરી આપતી વખતે કહ્યું હતું કે ફેડરેશનની પસંદગી નીતિ ભેદભાવપૂર્ણ છે કારણ કે તેના જેવી અનુભવી ખેલાડી, જે પ્રસૂતિ રજા પછી પરત ફરી રહી હતી, તેને ધ્યાનમાં લેવામાં આવી ન હતી.
હાઈકોર્ટે આદેશ આપ્યો હતો કે, 30 અને 31 મેના રોજ યોજાનારી પસંદગી ટ્રાયલનું ફેડરેશન દ્વારા વિડીયો રેકોર્ડિંગ કરવામાં આવે. આ સમયગાળા દરમિયાન, સ્પોર્ટ્સ ઓથોરિટી ઓફ ઈન્ડિયા (SAI) અને ભારતીય ઓલિમ્પિક એસોસિએશન (IOA) ના એક સ્વતંત્ર નિરીક્ષક પણ હાજર રહેશે.
કોર્ટે અપીલકર્તા (વિનેશ) ને એશિયન ગેમ્સ પસંદગી ટ્રાયલ્સમાં ભાગ લેવાની મંજૂરી આપવાનો આદેશ આપ્યો હતો. કોર્ટે જણાવ્યું હતું કે પસંદગી ટ્રાયલ માટે નક્કી કરાયેલા ધોરણો વર્તમાન પ્રથા કરતા નોંધપાત્ર રીતે અલગ છે.
હાઇકોર્ટમાં દાખલ કરેલી અરજીમાં, વિનેશે WFI ની પસંદગી નીતિ અને પરિપત્રને પડકાર્યો હતો, જેમાં કહેવામાં આવ્યું હતું કે ફક્ત અમુક ટુર્નામેન્ટમાં મેડલ વિજેતાઓ જ એશિયન ગેમ્સ ટ્રાયલ્સમાં ભાગ લઈ શકે છે.
