Morbi મહીલાના ગળામાંથી સોનાના ચેઈનની ચીલઝડપ કરનાર રીઢો ગુનેગાર ઝડપાયો

(રવિ નિમાવત દ્વારા) Morbi તા.૮
મોરબીના ગેસ્ટ હાઉસ રોડ પર ધોળાધિવસે એક્ટિવા પર જઈ રહેલા દંપતીને ટાર્ગૅટ બનાવી મહિલાના ગળામાંથી દોઢ તોલાના સોનાના ચેઈનની ચીલઝડપ થવાની સનસનાટીભરી ઘટના સામે આવી છે. આ મામલે ભોગ બનનાર મહિલાના પતિએ મોરબી સીટી એ ડિવિઝન પોલીસ સ્ટેશનમાં ફરિયાદ નોંધાવ્યા બાદ પોલીસે તપાસ હાથ ધરી આરોપીને ઝડપી પાડ્યો હતો.
મોરબીના શનાળા રોડ પર ભક્તિનગરમાં રહેતા ભાવેશભાઇ વિનુભાઇ મહેતા તેમના પત્ની સાથે એક્ટિવા પર ખરીદી કરીને પરત ઘરે જઈ રહ્યા હતા. આ દરમિયાન ગેસ્ટ હાઉસ રોડ પર ખાટકીવાસ ચોક નજીક પાછળથી આવેલા એક અજાણ્યા મોટરસાયકલ ચાલકે ભાવેશભાઇના પત્નીના ગળામાંથી આશરે દોઢ તોલા વજનનો અને ૧,૭૫,૦૦૦ ની કિંમતનો સોનાનો ચેઈન આંચકી લીધો હતો અને ત્યાંથી નાસી છૂટ્યો હતો. આ અંગે ભાવેશભાઇએ પોલીસમાં ફરિયાદ નોંધાવી હતી. પોલીસે ગુનો નોંધી તપાસના ચક્રો ગતિમાન કર્યા હતા, જેમાં સીટી એ ડિવિઝન પોલીસે ટેકનિકલ સોર્સ અને બાતમીદારોની મદદથી લૂંટ ચલાવનાર આરોપી સરફરાજ ઉર્ફે ફેઝલ અબ્દુલભાઇ મંધરીયા (રહે. ભુજ કેમ્પ એરિયા, ચાવડી પોલીસ ચોકી પાસે) ને ઝડપી પાડી કાયદેસરની કાર્યવાહી હાથ ધરી છે.તો આરોપી સરફરાજ પર ભુજ એ ડીવીઝન અને બી ડીવીઝન પોલીસમાં ૧૧ ગુના નોંધાઈ ચુક્યા છે.તેમજ પોલીસે આરોપી પાસેથી યામાહા કંપનીનું મોટર સાઈકલ.મોબાઈલ ફોન,કપડા,માસ્ક અને ટોપી સહિતનો મુદામાલ કબજે કર્યો છે