Mumbai,તા.21
Indian Stock Marketમાં છેલ્લા ચાર વર્ષમાં સેકન્ડરી માર્કેટની સાથે Primary Market માં સંખ્યાબંધ કંપનીઓ તેમની ઈનિશિયલ પબ્લિક ઓફરિંગ (IPO) લઈને મૂડી બજારમાં આવ્યા બાદ છેલ્લા ચાર મહિનાથી વિક્રમી તેજીને બ્રેક લાગી પીછેહઠ જોવાઈ છે. આ સાથે Primary Market માં પણ ઈસ્યુઓની વણઝાર અટકતી જોવાઈ છે. જેમાં ખાસ ૨૦૨૫ના પ્રથમ બે મહિનામાં તુલનાત્મક ઓછા IPO આવ્યા છતાં નાણા વર્ષ ૨૦૨૫-૨૬ની શરૂઆતથી Primary Market માં ઈસ્યુઓની સંખ્યામાં વૃદ્વિ ચાલુ થવાનો અંદાજ મૂકાઈ રહ્યો છે. વર્ષ ૨૦૨૫-૨૬ અને વર્ષ ૨૦૨૬-૨૦૨૭માં મળીને બે વર્ષમાં ૧૦૦૦થી વધુ કંપનીઓ IPO સાથે મૂડી બજારમાં પ્રવેશશે એવો અંદાજ છે.
એક રિપોર્ટ મુજબ ભારતના IPO માર્કેટમાં ૨૦૨૫ પબ્લિક ઓફરિંગમાં ફરી વૃદ્વિ સાથે શ્રેષ્ઠ બની રહેવાનો અંદાજ છે. રોકાણની વધુ તકો અને વપરાશમાં વૃદ્વિ સાથે આર્થિક વૃદ્વિ વ્યાપક રીતે સારી રહેવાના અંદાજોએ Primary Marketમાં સળવળાટ વધવાની શકયતા વ્યક્ત કરાઈ છે. એસોસીયેશન ઓફ ઈન્ડિયન બેંકર્સ ઈન ઈન્ડિયા (એઆઈબીઆઈ) દ્વારા આગામી બે નાણાકીય વર્ષમાં ૧૦૦૦થી વધુ IPO સાથે કંપનીઓ મૂડી બજારમાં પ્રવેશશે એવો અંદાજ મૂકાયો છે. નાણા વર્ષ ૨૦૨૫-૨૬ Primary Marketમાં કેટલીક મોટી કંપનીઓના આઈપીઓ સાથે શ્રેષ્ઠ બની રહેવાનો અંદાજ છે. જેમાં ટેલીકોમ જાયન્ટ રિલાયન્સ જિયો રૂ.૮ લાખ કરોડના વેલ્યુએશન સાથે મેગા આઈપીઓ લઈને મૂડી બજારમાં પ્રવેશે એવો અંદાજ છે. આ સિવાય દક્ષિણ કોરિયાની હ્યુન્ડાઈના ભારતીય સાહસ હ્યુન્ડાઈ ઈન્ડિયા બાદ હવે એલજી ઈલેક્ટ્રોનિક્સ ઈન્ડિયા પણ તેના વર્તમાન શેરધારકોની ઓફર ફોર સેલ લઈને રોકાણકારો પાસેથી રૂ.૧૫,૦૦૦ કરોડથી વધુ મૂડી ઊભી કરવા મૂડી બજારમાં પ્રવેશે એવી શકયતા છે. આ સિવાય ઈલેક્ટ્રિક મોબિલિટી ક્ષેત્રે એથર એનજીૅ રૂ.૪૫૦૦ કરોડ જેટલી મૂડી ઊભી કરવા આઈપીઓ લાવે એવી સંભાવના છે.
ઉપરોક્ત પ્રમુખ મોટી કંપનીઓ સિવાય ક્વિક કોમર્સ ક્ષેત્રે ઝેપ્ટો પણ એક અબજ ડોલરના વેલ્યુએશન સાથે Primary Marketમાં ઈન્વેસ્ટરો પાસેથી મોટું ફંડ એકત્ર કરે એવી શકયતા છે. કેટલીક અન્ય કંપનીઓમાં ઈન્ફ્રાસ્ટ્રકચર ક્ષેત્રે જેએસડબલ્યુ સિમેન્ટ રૂ.૪૦૦૦ કરોડ સુધીના આઈપીઓ માટે ડીઆરએચપી ફાઈલ કરી શકે છે. દેશનું સૌથી મોટું સ્ટોક એક્સચેન્જ નેશનલ સ્ટોક એક્સચેન્જ (એનએસઈ)ના આઈપીઓની તૈયારી વચ્ચે દેશની સૌથી મોટી ડિપોઝિટરી સર્વિસિઝ કંપની એનએસડીએલ પણ ઓફર ફોર સેલ થકી રૂ.૩૦૦૦ કરોડ ઊભા કરવા ઈસ્યુ લાવી શકે છે. આ સાથે ઓડિયો અને વેરેબલ બ્રાન્ડ બોટ રૂ.૨૦૦૦ કરોડનો આઈપીઓ લાવી મૂડી ઊભી કરી શકે છે.
જાણકારોનું માનવું છે કે, હાલ છેલ્લા ચાર મહિનામાં સેકન્ડરી માર્કેટમાં શેરોમાં મોટું કરેકશન આવતાં રોકાણકારોનો વિશ્વાસ ડગમગ્યો છે, જેના કારણે Primary Market પર પણ અસર જોવાઈ રહી છે. જેથી સેકન્ડરી માર્કેટમાં રિકવરી આવ્યા બાદ Primary Marketમાં નાણા વર્ષ ૨૦૨૫-૨૬ના આરંભ પછી ઈસ્યુઓની સંખ્યા વધતી જોવાશે.
