Islamabad,તા.30
અમેરિકાના પ્રમુખ ડોનાલ્ડ ટ્રમ્પને ખુશ કરવાના એક પણ પ્રયાસ પાકિસ્તાન છોડતુ નથી પરંતુ તેમાં કયારેક મુર્ખાઈભરી હરકતો પણ કરી નાંખે છે. ટ્રમ્પના ફેમીલીનો ડીજીટલ કરન્સીનો મોટો બિઝનેસ છે અને હાલમાં જ તેના કોઈન્સ પણ લોન્ચ થયા છે તે સમયે પાકિસ્તાને હવે બીટકોઈન આધારિત રિઝર્વ ઉભુ કરવા જાહેરાત કરી છે.
જો કે રસપ્રદ બાબત એ છે કે, પાકિસ્તાનમાં ક્રિપ્ટોકરન્સી પર પુર્ણ રીતે પ્રતિબંધ છે. પાકિસ્તાન ક્રિપ્ટોકાઉન્સીલના સીઈઓ બિલ્લાલ બિન સાકીબ એ હાલમાં જ લાસવેગાસમાં યોજાયેલી બીટકોઈન કોન્ફરન્સમાં હાજરી આપી હતી અને બાદમાં જાહેરાત કરી કે અમારા દેશની સરકાર બીટકોઈન આધારીત રિઝર્વ ઉભુ કરશે.
આમ કહીને તેમણે ટ્રમ્પ અને તેના શાસનને ખુશ કરવા પ્રયત્ન કર્યો અને એ પણ કહ્યું કે અમને અમેરિકામાંથી જ આ પ્રેરણા મળી છે. જો કે પાકિસ્તાન સ્ટેટ બેંક અને પાકના નાણાવિભાગે જાહેર કર્યુ છે કે દેશમાં કોઈપણ પ્રકારના ક્રિપ્ટોકરન્સી પર પ્રતિબંધ છે.
પાકિસ્તાની સંસદમાં પણ આ વિવાદ પહોંચ્યો હતો અને એ પણ જાહેર થયુ કે સરકારે હજુ ક્રિપ્ટોકરન્સી માટે કોઈ કાનૂની માળખુ તૈયાર કર્યુ નથી તેથી રિઝર્વ ઉભુ કરવાનો કોઈ પ્રશ્ન જ નથી પણ ફકત ટ્રમ્પને ખુશ કરવા જ પાકિસ્તાને આ ચાલ રમી હોય તેવો સંકેત છે.
