ગામમાં ચીજવસ્તુઓ ખરીદવા જતી વેળાએ નડ્યો અકસ્માત, પરિવારમાં શોક
Rajkot તા.૧૬
Rajkot શહેરની ભાગોળે આણંદપર (બાઘી) નજીક અજાણ્યા વાહને અડફેટે લેતા ગંભીર ઈજાઓ પહોંચી હતી. લોહીલુહાણ હાલતમાં યુવકને ૧૦૮ મારફતે હોસ્પિટલ ખસેડવામાં આવ્યો હતો, જ્યાં ચાલુ સારવાર દરમિયાન તેણે દમ તોડ્યો હતો. આ બનાવથી દહીસરા અને કોઠારીયા પંથકમાં અરેરાટી વ્યાપી ગઈ છે.પ્રાપ્ત વિગતો મુજબ, મૂળ જસદણના દહીસરા ગામના વતની અને હાલ કોઠારીયા-આણંદપર (બાઘી) વાડી રાખીને ખેતીકામ કરતા હાર્દિક મુકેશભાઈ માલકીયા (ઉં ૨૧) ગત રાત્રે ૭:૩૦ વાગ્યાની આસપાસ પોતાનું મોટરસાયકલ લઈને ગામમાં કોઈ વસ્તુ લેવા માટે નીકળ્યો હતો. દરમિયાન કોઠારીયા અને આણંદપર રોડ વચ્ચે હાર્દિક ઈજાગ્રસ્ત અને લોહીલુહાણ હાલતમાં રસ્તા પર પડેલો જોવા મળ્યો હતો. ઘટનાની જાણ થતાં જ ૧૦8ની ટીમ તાત્કાલિક દોડી ગઈ હતી અને ઈજાગ્રસ્ત હાર્દિકને સારવાર માટે હોસ્પિટલ ખસેડ્યો હતો. પરંતુ કમનસીબે, ચાલુ સારવાર દરમિયાન જ તેણે દમ તોડી દીધો હતો. પ્રાથમિક તપાસમાં જાણવા મળ્યું છે કે? મૃતકનો પરિવાર હજુ ૧૫ દિવસ પહેલા જ અહીં કોઠારીયા-આણંદપર વચ્ચે બાઘી વાડી રાખી હતી અને ત્યાં રહેવા આવ્યા હતા. મૃતક હાર્દિક બે ભાઈઓમાં મોટો અને કુવારો હતો. ઘરના મોટા દીકરાના અકાળે અવસાનથી પરિવારમાં ઘેરા શોકની લાગણી પ્રસરી ગઈ છે. પોલીસે આ મામલે અકસ્માતે મોતનો ગુનો નોંધી વધુ તપાસ હાથ ધરી છે.
