New Delhi, તા.27
આવનારો ઓગસ્ટ મહિનો શેરબજારના રોકાણકારો માટે ખૂબ જ ઉત્સાહજનક રહેવાનો છે. માર્કેટ નિષ્ણાતોના જણાવ્યાં અનુસાર, 12 કરતાં પણ વધુ કંપનીઓ ઓગસ્ટ મહિનામાં તેમના આઈપીઓ (ઈનિશિયલ પબ્લિક ઓફરિંગ) લાવવાની તૈયારી કરી રહી છે.
આ તમામ કંપનીઓ મળીને પ્રાથમિક બજારમાંથી રૂ।.25,000 કરોડથી વધુ રકમ એકઠી કરવાનો લક્ષ્યાંક ધરાવે છે. શેરબજારમાં જોવા મળી રહેલી સ્થિરતા અને રોકાણકારોના સકારાત્મક વલણને કારણે જે કંપનીઓ લાંબા સમયથી રાહ જોઈ રહી હતી, તેઓ હવે પોતાનાં આઈપીઓ લોન્ચ કરવા જઈ રહી છે.
આ આઈપીઓ રેસમાં સૌથી મોટો ધમાકો ક્વિક-કોમર્સ પ્લેટફોર્મ ઝેપ્ટો કરવાનો છે, જે લગભગ રૂ।.8,010 કરોડનાં નવા શેર બહાર પાડશે અને સાથે ઓનર્સ પોતાનાં 11.34 કરોડ શેર વેચશે (OFS). આ સિવાય લોજિસ્ટિક્સ ક્ષેત્રની જાણીતી કંપની શિપરોકેટ પણ રૂ।.2,342 કરોડનો આઈપીઓ લાવવાની તૈયારીમાં છે. હાઉસિંગ ફાઇનાન્સ ક્ષેત્રની ટ્રુહોમ કંપની રૂ।.3,000 કરોડ અને એલિવેટ કેમ્પસ રૂ।.2,550 કરોડનો પબ્લિક ઈશ્યૂ માર્કેટમાં મૂકશે.
માત્ર ઈ-કોમર્સ કે ફાઈનાન્સ જ નહીં, પરંતુ ડેરી અને મેન્યુફેક્ચરિંગ સેક્ટરની કંપનીઓ પણ આ યાદીમાં સામેલ છે. જેમાં મિલ્કી મિસ્ટ ડેરી રૂ।.1,553 કરોડ અને ઈનોવેટીવ્યુ ઈન્ડિયા રૂ।.2,000 કરોડ એકત્રિત કરશે. આ સિવાય ધૂપ ટ્રાન્સમિશન, આર્સિલ, ગજા અલ્ટરનેટિવ અને શંકેશ જ્વેલર્સ જેવી નાની-મોટી અન્ય 8 થી 10 કંપનીઓ પણ પ્રાથમિક બજારમાં કદમ મૂકવા જઈ રહી છે.
એકંદરે, જો તમે શેરબજાર કે આઈપીઓમાં રોકાણ કરવાનું વિચારી રહ્યાં છો, તો ઓગસ્ટ મહિનો તમારી માટે કમાણીની નવી તકો લઈને આવી રહ્યો છે. નવા રોકાણકારો માટે આ કંપનીઓનાં બિઝનેસ મોડેલ અને ફાયનાન્સિયલ ગ્રોથ જોઈને રોકાણ કરવાનો આ ઉત્તમ સમય સાબિત થઈ શકે છે.
