New Delhi, તા. 30
ઈન્વેસ્ટમેન્ટ બેંક હુલિહાન લોકીના તાજેતરનાં રિપોર્ટ અનુસાર, ઈન્ડિયન પ્રીમિયર લીગ (IPL)નું બિઝનેસ વેલ્યુએશન વર્ષ 2026માં 11.4 ટકા વધીને 20.6 અબજ ડોલર આશરે રૂા.1.72 લાખ કરોડ સુધી પહોંચી ગયું છે.
લીગની એકલ બ્રાન્ડ વેલ્યુ પણ 10.3 ટકા વધીને 4.3 અબજ ડોલર થઈ ગઈ છે. આ વર્ષે લીગની કુલ આવક 1.8 અબજડોલર ને પાર કરી ગઈ છે. પ્રતિ મેચ મીડિયા રાઇટ્સના મૂલ્યની દ્રષ્ટિએ IPL હવે અમેરિકાની નેશનલ ફૂટબોલ લીગ (NFL) પછી વિશ્વમાં બીજા ક્રમે આવે છે.
આ રિપોર્ટમાં રોયલ ચેલેન્જર્સ બેંગલુ (RCB) દેશની સૌથી મૂલ્યવાન ફ્રેેન્ચાઇઝી બનીને ઊભરી આવી છે. RCBની બ્રાન્ડ વેલ્યુ 16 ટકા વધીને 312 મિલિયન ડોલર થઈ ગઈ છે, અને તે 300 મિલિયનનો આંકડો પાર કરનારી આઈપીએલની પ્રથમ ટીમ બની છે.
આ યાદીમાં મુંબઈ ઈન્ડિયન્સ (MI) બીજા ક્રમે રહી છે, જેની બ્રાન્ડ વેલ્યુ 9 ટકા વધીને 264 મિલિયન થઈ છે, ભલે તેઓ છેલ્લી સિઝનમાં પોઈન્ટ ટેબલમાં નવમાં ક્રમે રહ્યાં હતાં. આ વર્ષે IPLના ઈતિહાસનાં બે સૌથી મોટા માલિકી સોદા પણ જોવા મળ્યાં.
બ્લેકસ્ટોન, બોલ્ટ વેન્ચર્સ, આદિત્ય બિરલા ગ્રુપ અને ‘ધી ટાઇમ્સ ઓફ ઇન્ડિયા’ના ક્નસોર્ટિયમે RCBને લગભગ 1.8 અબજના રેકોર્ડ વેલ્યુએશન પર ખરીદી લીધી, જે કોઈપણ સિંગલ ફ્રેન્ચાઇઝી માટેની અત્યાર સુધીની સૌથી મોંઘી ડીલ છે. આ ઉપરાંત, રાજસ્થાન રોયલ્સને મિત્તલ ફેમિલી અને આદર પુનાવાલાએ આશરે 1.7 અબજ ડોલર ના મૂલ્ય પર ખરીદી હતી.
RCBના વાઇસ ચેરમેન સત્યાન ગજવાણીએ જણાવ્યું હતું કે, “આખી લીગમાં RCBના ફેન્સનો ઉત્સાહ અને જોડાણ બેજોડ છે, જેણે આ તકને ખાસ બનાવી છે.” તેમણે ઉમેર્યું કે ભારતની આવક વધી રહી છે અને કનેક્ટેડ ટીવી ઘરે-ઘરે પહોંચી રહ્યાં છે, જેથી ભવિષ્યમાં IPLની આવક તેની વિશાળ દર્શક સંખ્યાની સમકક્ષ પહોંચી જશે.
હુલિહાન લોકીના ડિરેક્ટર હર્ષ તાલિકોટીના જણાવ્યાં મુજબ, આ વર્ષનાં મોટા સોદાઓએ સાબિત કર્યું છે કે આ લીગ વૈશ્વિક અને વ્યૂહાત્મક મૂડીને આકર્ષવામાં સફળ રહી છે.
જ્યારે પંજાબ કિંગ્સના કો-ઓનર નેસ વાડિયાએ જણાવ્યું કે સેન્ટ્રલાઈઝ્ડ મીડિયા રાઈટ્સ, રેવેન્યુ શેરિંગ અને નાણાકીય શિસ્તતાએ આ લીગને એક ટકાઉ અને સ્થિર મોડેલ બનાવ્યું છે, જેથી ટીમનાં માલિકો માત્ર આગામી સિઝન પૂરતું વિચારવાના બદલે લાંબા ગાળાના રોકાણ માટે પ્રોત્સાહિત થાય છે.
