મિનાર મંડલ આ વિસ્તારનાં પથ્થરનાં મોટા વેપારી અને રેતી માફિયા ટુલ્લુ મંડલની પત્નીનો ભાઇ છે
West Bengal , તા.૩૦
પોલીસે બુધવારે પશ્ચિમ બંગાળનાં બીરભૂમ જિલ્લામાં એક ભૂતપૂર્વ સરકારી બસ ડ્રાઇવર અને હાલમાં પથ્થરનાં વેપારીનાં ઘરમાંથી ઓછામાં ઓછા ૨૦ કરોડ રૂપિયા રોકડા અને ૧૫ કિલો સોનું જપ્ત કર્યુ છે. આ જપ્તીને પશ્ચિમ બંગાળમાં અત્યાર સુધી કરવામાં આવેલી સૌથી જપ્તી પૈકીની એક ગણવામાં આવી રહી છે.પોલીસે જણાવ્યું હતું કે તેમણે દેઉચા ગામમાં મિનાર મંડલનાં બે માળનાં નિવાસસ્થાનમાંથી એક કિલોગ્રામ વજનનાં ૧૪ સોનાનાં બાર અને ૧૦૦ ગ્રામનાં ૧૦ સોનાનાં બિસ્કિટ જપ્ત કર્યા છે. જેની કીંમત હાલનાં ભાવે ૨૧.૫ કરોડ રૂપિયા થાય છે.છેલ્લે મળેલા સમાચાર અનુસાર રોકડ નોટોની ગણતરી ચાલુ જ હતી. છેલ્લી ગણતરી મુજબ રોકડ ચલણી નોટોનો આંક ૨૦ કરોડ રૂપિયાને પાર થઇ ગયો હતો.જેના ઘરમાંથી રોકડ રકમ અને સોનું જપ્ત કરવામાં આવ્યું છે તેની ઓળખ મિનાર મંડલ તરીકે કરવામાં આવી છે. મિનાર મંડલ આ વિસ્તારનાં પથ્થરનાં મોટા વેપારી ટુલ્લુ મંડલની પત્નીનો ભાઇ છે. રોકડ રકમ ગણવા માટે નોટો ગણવાનાં પાંચ મશીનો મંગાવવામાં આવ્યા હતાં. ઉલ્લેખનીય છે કે મુખ્યપ્રધાન સુવેન્દુ અધિકારીએ ટુલ્લુ મંડલને રેતી માફિયા ગણાવ્યો હતો.ઉલ્લેખનીય છે કે બીરભૂમ જિલ્લો લાંબા સમયથી ગેરકાયદે માઇનિંગ અને પથ્થરનાં વેપાર સાથે જોડાયેલ સંગઠિત અપરાધોને કારણે તપાસનાં દાયરામાં છે.ટુલ્લુનું નામ કરોડો રૂપિયાનાં પશુઓની દાણચોરીનાં કેસની સીબીઆઇ તપાસમાં સામે આવ્યું હતું. ઓગસ્ટ, ૨૦૨૨માં એજન્સીએ જિલ્લાનાં મોહંમદ બજાર વિસ્તારમાં તેની ઓફીસ અને ગોડાઉન ઉપરાંત તેમની અનેક સંપત્તિઓની તપાસ કરી હતી. તે જ વર્ષે નવેમ્બરમાં ઇડીએ પૂછપરછ માટે તેને દિલ્હી બોલાવ્યો હતો. ઇડીનું સમન્સ મળ્યાનાં ૪૮ કલાકની અંદર જ હત્યાનાં એક કેસમાં બીરભૂમ પોલીસે તેની ધરપકડ કરી લીધી હતી.
