New Delhi,,તા.૧૨
ભરતી પરીક્ષાઓમાં ગેરરીતિઓ સામે ઝારખંડમાં ચાલી રહેલા વિદ્યાર્થી વિરોધ પ્રદર્શન અંગે રાજકીય વક્તવ્ય તીવ્ર બન્યું છે. ભાજપના સાંસદ નિશિકાંત દુબેએ કોંગ્રેસ નેતા રાહુલ ગાંધી પર આકરો પ્રહાર કર્યો, તેમની તુલના પાકિસ્તાનના સ્થાપક મુહમ્મદ અલી જિન્નાહ સાથે કરી. દુબેએ કહ્યું કે રાહુલ ગાંધી જિન્નાહ કરતા પણ ખરાબ નેતા છે. તેમણે ઉમેર્યું કે જિન્નાહનો રાહુલ ગાંધીમાં પુનર્જન્મ થયો છે.
ઝારખંડમાં વિદ્યાર્થીઓના વિરોધ પ્રદર્શન અંગે ભાજપના સાંસદ નિશિકાંત દુબેએ કહ્યું, “તેઓ સીબીઆઈ તપાસ કેમ નથી ઇચ્છતા? મુખ્ય આરોપી ધર્મેન્દ્રની ઝારખંડ સરકારના એક વરિષ્ઠ અધિકારીના ઘરેથી ધરપકડ કરવામાં આવી હતી. તેઓ જાણે છે કે જો તપાસ કરવામાં આવશે તો હેમંત સોરેનનું નામ પણ સામે આવશે. એટલા માટે આ બધું થઈ રહ્યું છે. તેમણે (કોંગ્રેસ) ઝારખંડ સરકારમાંથી પોતાનો ટેકો પાછો ખેંચવો જોઈએ અને બતાવવું જોઈએ કે તેઓ વિદ્યાર્થીઓના હિતમાં છે. નહીં તો, એવું લાગશે કે તેઓ સોરોસના એજન્ડા પર કામ કરી રહ્યા છે.”
તેમણે કહ્યું, “જ્યાં પણ વડા પ્રધાન સામે વિરોધ થાય છે, ત્યાં રાહુલ ગાંધી દેખાય છે. તેઓ ઝીણા કરતાં પણ ખરાબ નેતા છે.” સોશિયલ મીડિયા પ્લેટફોર્મ ઠ પર આ જ નિવેદનનો વીડિયો શેર કરતા ભાજપના સાંસદે લખ્યું, “જીન્નાહનો રાહુલ ગાંધીના રૂપમાં પુનર્જન્મ થયો છે.”
ઝારખંડમાં નોકરી ઇચ્છુકો દ્વારા બુધવારે ૧૯મા દિવસે પણ વિરોધ ચાલુ રહ્યો. પ્રદર્શનકારીઓ ભરતી પરીક્ષાઓમાં ગેરરીતિઓ અંગે પારદર્શિતા, અનેક પરીક્ષાઓ રદ કરવા અને સમગ્ર મામલાની સ્વતંત્ર તપાસની માંગ કરી રહ્યા છે. વિદ્યાર્થીઓની મુખ્ય માંગણીઓમાં ઝારખંડ પબ્લિક સર્વિસ કમિશન અને ઝારખંડ સ્ટાફ સિલેક્શન કમિશન પરીક્ષાઓમાં પારદર્શિતા સુનિશ્ચિત કરવાનો સમાવેશ થાય છે. પ્રદર્શનકારીઓ સીબીઆઇ તપાસ અથવા રાજ્ય બહારના નિવૃત્ત હાઇકોર્ટના ન્યાયાધીશોની સમિતિ દ્વારા તપાસની પણ માંગ કરી રહ્યા છે.
સોમવારે, વિદ્યાર્થીઓએ વિધાનસભા તરફ કૂચ કરવાનો પ્રયાસ કર્યો. પોલીસે પ્રદર્શનકારીઓને રોકવા માટે લાઠીચાર્જ, ટીયર ગેસ અને પાણીના તોપનો ઉપયોગ કર્યો. વિદ્યાર્થીઓએ દાવો કર્યો હતો કે ઘણા લોકો ઘાયલ થયા છે, જ્યારે રાંચી પોલીસે અહેવાલ આપ્યો છે કે અથડામણમાં તેમના ૧૪ કર્મચારીઓ ઘાયલ થયા છે.
પોલીસ કાર્યવાહીના વિરોધમાં ભાજપે મંગળવારે રાજ્યવ્યાપી બંધનું એલાન આપ્યું હતું. બંધ દરમિયાન, ઘણા જિલ્લાઓમાં રસ્તાઓ બ્લોક કરવામાં આવ્યા હતા, બજારો બંધ કરવામાં આવ્યા હતા અને શૈક્ષણિક સંસ્થાઓને પણ અસર થઈ હતી. ભાજપે ભરતી પરીક્ષાઓમાં કથિત ગેરરીતિઓની સ્વતંત્ર તપાસની માંગ કરી હતી અને હેમંત સોરેન સરકાર પર વિદ્યાર્થીઓના અવાજોને દબાવવાનો આરોપ લગાવ્યો હતો.
મુખ્યમંત્રી હેમંત સોરેને જણાવ્યું છે કે તેમની સરકાર ભરતી પરીક્ષા પ્રણાલીમાં સુધારા માટે પ્રતિબદ્ધ છે. તેમણે વિરોધ કરી રહેલા વિદ્યાર્થીઓને ખાતરી પણ આપી હતી કે ૧૪મી જેપીએસસી પરીક્ષા રદ કરવામાં આવશે. આ દરમિયાન, સોરેને ભાજપ પર વિદ્યાર્થી આંદોલનનો ઉપયોગ રાજકીય પ્લેટફોર્મ તરીકે કરવાનો આરોપ લગાવ્યો. પરિણામે, વિદ્યાર્થી આંદોલન હવે પરીક્ષા સુધારા અને ભરતી પ્રક્રિયાઓથી આગળ વધી ગયું છે અને ઝારખંડમાં શાસક પક્ષ અને વિપક્ષ વચ્ચે એક મોટો રાજકીય સંઘર્ષ બની ગયું છે.
