સુપ્રીમ કોર્ટે ભારતીય ક્રિકેટ નિયંત્રણ બોર્ડ અને તમામ રાજ્ય ક્રિકેટ સંગઠનોને પૂછ્યું
New Delhi ,તા.૯
સુપ્રીમ કોર્ટે ભારતીય ક્રિકેટ નિયંત્રણ બોર્ડ (બીસીસીઆઇ) અને તમામ રાજ્ય ક્રિકેટ સંગઠનોને પૂછ્યું છે કે તેમને રાષ્ટ્રીય રમતગમત શાસન અધિનિયમ, ૨૦૨૫ ના દાયરામાં કેમ ન લાવવા જોઈએ. કોર્ટે બીસીસીઆઇ અને રાજ્ય ક્રિકેટ સંગઠનના અધિકારીઓની સેવા શરતોને પણ આ કાયદા હેઠળ લાવવા જોઈએ કે કેમ તેના જવાબો પણ માંગ્યા હતા. મુખ્ય ન્યાયાધીશ સૂર્યકાંતની આગેવાની હેઠળની ત્રણ સભ્યોની બેન્ચે બીસીસીઆઇ સંબંધિત કેસની સુનાવણી દરમિયાન આ પ્રશ્ન ઉઠાવ્યો હતો. બેન્ચમાં ન્યાયાધીશ જોયમલ્યા બાગચી અને ન્યાયાધીશ વી. મોહના પણ સામેલ હતા. આ કેસ ૨૦૧૪ થી સુપ્રીમ કોર્ટમાં પેન્ડિંગ છે, અને સમયાંતરે કોર્ટ સમક્ષ તેની સાથે સંબંધિત વિવિધ અરજીઓ લાવવામાં આવી છે.
બીસીસીઆઇ અને રાજ્ય ક્રિકેટ સંગઠનોનું પ્રતિનિધિત્વ કરતા વકીલો પાસેથી સૂચના લીધા પછી, સુપ્રીમ કોર્ટે તેમને સમજાવવા કહ્યું કે તેમના અધિકારીઓના કાર્યકાળ અને સેવાની શરતો ૨૦૨૫ માં અમલમાં આવેલા રાષ્ટ્રીય રમત શાસન કાયદાને આધીન કેમ ન હોવી જોઈએ. કોર્ટના આ પ્રશ્ને એ મુદ્દો ઉઠાવ્યો છે કે નવા રમત શાસન કાયદાની જોગવાઈઓ બીસીસીઆઇ દેશમાં ક્રિકેટનું સંચાલન કરતી સંસ્થા અને તેના રાજ્ય સંગઠનો પર કેવી રીતે લાગુ થશે.
બીસીસીઆઇની કામગીરી અને સુધારાઓ અંગેની અરજી ૨૦૧૪ થી સુપ્રીમ કોર્ટમાં પેન્ડિંગ છે. આ કિસ્સામાં, કોર્ટે ક્રિકેટ વહીવટ સુધારવા માટે ઘણા મહત્વપૂર્ણ પગલાં લીધા છે. સુપ્રીમ કોર્ટે અગાઉ ભૂતપૂર્વ મુખ્ય ન્યાયાધીશ આર.એમ. લોઢાની અધ્યક્ષતામાં એક સમિતિની નિમણૂક કરી હતી. આ સમિતિને બીસીસીઆઇમાં સુધારા માટે પગલાં સૂચવવાનું અને ક્રિકેટ બોર્ડ માટે નવું બંધારણ તૈયાર કરવાનું કામ સોંપવામાં આવ્યું હતું. બાદમાં, સુપ્રીમ કોર્ટે લોઢા સમિતિની ભલામણો સ્વીકારી અને બીસીસીઆઇના માળખા, સંગઠન અને કામગીરીમાં સુધારો કરવા માટે અનેક જોગવાઈઓ લાગુ કરી.
સપ્ટેમ્બર ૨૦૨૨ માં, સુપ્રીમ કોર્ટે મ્ઝ્રઝ્રૈં પદાધિકારીઓના કાર્યકાળ અંગેના તેના અગાઉના આદેશમાં ફેરફાર કરવાની મંજૂરી આપી હતી. આ હેઠળ, એક પદાધિકારીને રાજ્ય ક્રિકેટ એસોસિએશન અને બીસીસીઆઇમાં કુલ ૧૨ વર્ષ સુધી પદ સંભાળવાની મંજૂરી આપવામાં આવી હતી. આ વ્યવસ્થા હેઠળ, એક અધિકારી રાજ્ય ક્રિકેટ એસોસિએશનમાં સતત છ વર્ષ અને બીસીસીઆઇમાં સતત છ વર્ષ સેવા આપી શકે છે. આ પછી, ત્રણ વર્ષનો કૂલિંગ-ઓફ સમયગાળો લાગુ પડે છે. કોર્ટે એમ પણ કહ્યું કે એક અધિકારી મ્ઝ્રઝ્રૈં અને રાજ્ય ક્રિકેટ એસોસિએશન બંને સ્તરે ચોક્કસ પદ પર સતત બે ટર્મ સેવા આપી શકે છે. આ પછી, તેમણે ત્રણ વર્ષનો કૂલિંગ-ઓફ સમયગાળો પૂર્ણ કરવો આવશ્યક છે.
સુપ્રીમ કોર્ટ દ્વારા અગાઉ મંજૂર કરાયેલ બીસીસીઆઇ બંધારણમાં સતત બે ત્રણ વર્ષના કાર્યકાળ પૂર્ણ કરનારા અધિકારીઓ માટે ફરજિયાત ત્રણ વર્ષનો કૂલિંગ-ઓફ પીરિયડ આપવામાં આવ્યો હતો. હવે, સુપ્રીમ કોર્ટ સમક્ષ એ પ્રશ્ન છે કે ૨૦૨૫માં લાગુ કરાયેલા રાષ્ટ્રીય રમતગમત શાસન અધિનિયમની જોગવાઈઓ બીસીસીઆઇ અને રાજ્ય ક્રિકેટ સંગઠનોને કેટલી હદ સુધી લાગુ પડશે. કોર્ટે આ મુદ્દે પક્ષકારો પાસેથી સ્પષ્ટ જવાબો માંગ્યા છે.
