Surendranagarતા.3
સુરેન્દ્રનગરમાં દર્દીઓના સ્વાસ્થ્ય સાથે ચેડાં થતા હોવાના ગંભીર આક્ષેપોને પગલે સુરેન્દ્રનગર શહેરમાં હડકંપ મચી ગયો છે. સુરેન્દ્રનગરના બસ સ્ટેશન રોડ પર આવેલી એક ખાનગી હોસ્પિટલમાં BHMS (બેચલર ઑફ હોમિયોપેથિક મેડિસિન એન્ડ સર્જરી) ડિગ્રી ધરાવતા ડોક્ટર દ્વારા કાયદાનું ઉલ્લંઘન કરીને એલોપેથી (આધુનિક દવાઓ)ની પ્રેકિ્ટસ કરવામાં આવતી હોવાની ચોક્કસ ફરિયાદ મળી હતી.
આ ફરિયાદને ગંભીરતાથી લઈને જિલ્લા પોલીસ અને આરોગ્ય વિભાગની ટીમે આજે આ હોસ્પિટલમાં અચાનક ચેકિંગ હાથ ધરીને સમગ્ર મામલે તપાસ શરૂ કરી છે, જેના કારણે શહેરમાં ગેરકાયદે પ્રેકિ્ટસ કરતા તબીબોમાં ફફડાટ ફેલાયો છે.
સુરેન્દ્રનગરની વિહાના હોસ્પિટલમાં ડોક્ટર અભિષેક ગોહિલ દ્વારા આ ગેરકાયદે પ્રેકિ્ટસ કરવામાં આવતી હોવાની આશંકા છે. પ્રાપ્ત માહિતી મુજબ, ડો. અભિષેક ગોહિલ પોતે હોમિયોપેથીની ડિગ્રી (BHMS) ધરાવતા હોવા છતાં, હોસ્પિટલમાં આવતા દર્દીઓને તેઓ એલોપેથીની દવાઓ આપી રહ્યા હતા. એલોપેથી દવાઓ માત્ર MBBS કે MD જેવી આધુનિક મેડિકલ ડિગ્રી ધરાવતા ડોક્ટરો જ આપી શકે છે.
એક હોમિયોપેથી ડોક્ટર દ્વારા એલોપેથી દવાઓ આપીને દર્દીઓના આરોગ્ય સાથે ગંભીર ચેડાં કરવામાં આવી રહ્યા હોવાની ફરિયાદ બી ડિવિઝન પોલીસ મથક સુધી પહોંચી હતી.
સ્થાનિક નાગરિકો તરફથી બી ડિવિઝન પોલીસ મથકે લેખિત રજૂઆત મળ્યા બાદ પોલીસે આ ગંભીર મામલાને ધ્યાને લીધો હતો. દર્દીઓના સ્વાસ્થ્યનો સવાલ હોવાથી, પોલીસે તાત્કાલિક જિલ્લા આરોગ્ય વિભાગની ટીમને સાથે રાખીને સંયુક્ત ચેકિંગ કાર્યવાહી હાથ ધરી હતી. પોલીસ અને આરોગ્ય વિભાગની ટીમે હોસ્પિટલના તમામ દસ્તાવેજો, દવાઓનો સ્ટોક અને તબીબી સ્ટાફની યોગ્યતાની ચકાસણી શરૂ કરી છે.
ચેકિંગ દરમિયાન અન્ય એક શંકાસ્પદ બાબત પણ સામે આવી છે. હોસ્પિટલના બોર્ડ પર જે ડોક્ટરનું નામ દર્શાવેલું હતું, તે ડોક્ટર આશિષ કાંજિયા હોસ્પિટલમાં નિયમિતપણે હાજર ન રહેતા હોવાની પણ આશંકા વ્યક્ત કરવામાં આવી છે. જો બોર્ડ પરના નિયુક્ત ડોક્ટર હાજર ન હોય અને તેમની જગ્યાએ અન્ય ગેરલાયક તબીબ પ્રેકિ્ટસ કરતા હોય, તો તે મેડિકલ નિયમોનું સ્પષ્ટ ઉલ્લંઘન ગણાય છે. આરોગ્ય વિભાગ દ્વારા આ અંગેના જરૂરી પુરાવા અને કાગળિયાં એકઠા કરવામાં આવી રહ્યા છે.
પોલીસની હાજરીમાં આરોગ્ય વિભાગની ટીમે હોસ્પિટલમાં દર્દીઓને આપવામાં આવતી દવાઓ, સારવારની પદ્ધતિ અને ડોક્ટરની લાયકાત સંબંધિત તમામ રેકોર્ડ્સ જપ્ત કર્યા છે. આરોગ્ય વિભાગના અધિકારીઓએ જણાવ્યું છે કે, સમગ્ર મામલે વધુ ઊંડાણપૂર્વક તપાસ હાથ ધરવામાં આવશે. આ તપાસના આધારે અને કાયદાકીય જોગવાઈઓ અનુસાર, આગામી સમયમાં યોગ્ય અને કડક કાર્યવાહી હાથ ધરવામાં આવશે. આ ઘટના સુરેન્દ્રનગર જિલ્લામાં મેડિકલ પ્રેકિ્ટસની ગુણવત્તા અને નિયમન અંગે સવાલો ઉભા કરે છે.
