Rajkot,તા.૩૧
Rajkotના ભક્તિનગર પોલીસ મથકની હદમાં બેરોકટોક અને મોટાપાયે રાંધણ ગેસના બાટલામાંથી ગેસ ચોરીનું એટલે કે ગેસ રિફિલિંગનું કારસ્તાન ચાલતુ હતું, જેની ઉપર ગઇકાલે બપોરે એસએમસીએ દરોડા પાડયા હતા. કુલ ૯ જગ્યાએ મકાન અને ગોડાઉનમાં દરોડા પાડી સાત આરોપીઓની ધરપકડ કરવામાં આવી હતી, જ્યારે ૧૫ આરોપીઓને વોન્ટેડ દર્શાવાયા હતા. તેમાંથી અમુક આરોપીઓ ચાર જેટલી ગેસ એજન્સીઓના ડિલીવરીમેન તરીકે કામ કરે છે.
એસએમસીએ બાતમીના આધારે નહેરૂનગર શેરી નં. ૨માં રમેશ ગગુભાઈ ચાવડા, શેરી નં. ૪માં મેરામ કરસનભાઈ ચાવડા, હરદેવ કાનાભાઈ ચાવડા, શેરી નં. ૮માં અમીત ધીરૂભાઈ ડાંગર, પ્રફુલ નારણભાઈ ડાંગર, શેરી નં. ૧૦માં આશિષ રમેશભાઈ ગોગરા, ધીરૂભાઈ રાયધનભાઈ ડાંગર અને શેરી નં. ૬માં ઉમેશ બોરીચાના મકાન અને ગોડાઉનમાં દરોડા પાડી મોટાપાયે ચાલતું ગેસ રિફિલિંગનું કારસ્તાન ઝડપી લીધું હતું.
સ્થળ પરથી કુલ સાત આરોપીઓની ધરપકડ કરવામાં આવી હતી. તમામ સ્થળોએથી રાંધણ ગેસના ૫૧૭ બાટલા, રિફિલિંગમાં ઉપયોગમાં લેવાતી ૧૬ પાઇપ, ૪૪ સ્ટીકર, ૪૮ ઢાંકણા, ૫ ઇલેક્ટ્રિક મોટર, ૧૪ વજન કાંટા, ૩ વાહનો, ૭ મોબાઇલ ફોન, વાંદરીપાનુ અને રૂા. ૯૧૦૦ની રોકડ સહિત કુલ રૂા. ૧૧.૪૫ લાખનો મુદ્દામાલ કબજે કર્યો હતો.
એસએમસીએ ભક્તિનગર પોલીસ મથકમાં તમામ આરોપીઓ વિરૂધ્ધ બીએનએસ અને આવશ્યક ચીજવસ્તુ ધારા ઉપરાંત એક્સપ્લોઝિવ એક્ટની કલમો હેઠળ કુલ બે ગુના દાખલ કરાવ્યા હતા. શહેરમાં વર્ષોથી ગેસ રિફિલિંગનું કારસ્તાન ચાલે છે. આ રીતે દરરોજ અનેક ગ્રાહકો સાથે છેતરપિંડી થાય છે. આમ છતાં પુરવઠા વિભાગ કે પોલીસના પેટનું પાણી હલતું નથી.
અગાઉ પોલીસ એકલદોકલ ગેસ રિફિલિંગના કારસ્તાનો પકડી કામગીરી દેખાડતી હતી. પરંતુ છેલ્લા કેટલાય સમયથી ગોઠવણ થઇ ગઇ હોય તેમ પોલીસ દરોડા જ પાડતી ન હતી. આટલા મોટાપાયે પોલીસની મીલીભગત વગર કારસ્તાન ચલાવવું મુશ્કેલ છે. બીજી એજન્સીઓ જ્યારે આ રીતના ગેરકાયદે કારસ્તાનો પકડે ત્યારે સ્થાનિક પોલીસ સામે ઇન્કવાયરી કરાવાય છે. આ કિસ્સામાં પણ ઇન્કવાયરી કરાવાય તેવી શક્યતા છે. જો કે કોઇની સામે પગલાં લેવાય તે બાબતે સંશય છે.
