નેલ્લોર અને નરસપુર વચ્ચે ચક્રવાતનું લેન્ડફોલ, આંધ્ર પ્રદેશ અને તેલંગાણામાં ભારે વરસાદથી જનજીવન અસ્તવ્યસ્ત; ખેડૂતોના પાકને મોટું નુકસાન થવાની આશંકા
Telangana,તા.૩
બંગાળની ખાડીમાં સર્જાયેલું ગંભીર ચક્રવાતી તોફાન ’Murasu Cyclones’ આંધ્ર પ્રદેશના દરિયાકાંઠે ત્રાટકતાં દક્ષિણ ભારતના અનેક વિસ્તારોમાં હાહાકાર મચ્યો છે. વાવાઝોડાને કારણે ૧૦૦થી ૧૧૦ કિલોમીટર પ્રતિ કલાકની ઝડપે પવન ફૂંકાયો હતો, જ્યારે પવનના ઝાપટાની ઝડપ ૧૨૦ કિલોમીટર પ્રતિ કલાક સુધી પહોંચી હતી. ભારે વરસાદ અને તોફાની પવનને કારણે આંધ્ર પ્રદેશ તથા તેલંગાણામાં સામાન્ય જનજીવન ખોરવાઈ ગયું છે.
પરિસ્થિતિની ગંભીરતાને ધ્યાનમાં રાખીને રેલવે અને હવાઈ સેવાઓ પર નિયંત્રણો મૂકવામાં આવ્યાં છે. આશરે ૩૨ ટ્રેનો અને ૧૧ ફ્લાઇટ્સ રદ કરવામાં આવી છે. બીજી તરફ, દરિયાકાંઠાના વિસ્તારોમાં ઊંચાં મોજાં અને ભારે વરસાદને કારણે માછીમારો તથા ખેડૂતોની મુશ્કેલીઓ વધી છે.
હવામાન વિભાગના જણાવ્યા અનુસાર, ચક્રવાતી તોફાન ઉત્તર-ઉત્તર-પશ્ચિમ દિશામાં આગળ વધીને મંગળવારે વહેલી સવારે ૩ઃ૩૦થી ૫ઃ૩૦ વાગ્યા દરમિયાન દક્ષિણ આંધ્ર પ્રદેશના દરિયાકાંઠે પહોંચ્યું હતું. નેલ્લોર અને નરસપુર વચ્ચે ઓંગોલ નજીક લેન્ડફોલની પ્રક્રિયા શરૂ થઈ હતી.
આ દરમિયાન ૧૦૦થી ૧૧૦ કિલોમીટર પ્રતિ કલાકની ઝડપે પવન ફૂંકાયો હતો અને કેટલાક વિસ્તારોમાં ઝાપટાની ઝડપ ૧૨૦ કિલોમીટર પ્રતિ કલાક સુધી પહોંચી હતી. વાવાઝોડાના વિશાળ વૉલ ક્લાઉડનો ભાગ પણ દરિયાકાંઠાના વિસ્તારોમાં પ્રવેશી ચૂક્યો હતો. ચક્રવાતની અસરને કારણે વિશાખાપટ્ટનમના ઋષિકોંડા બીચ નજીક એક બોટ મુશ્કેલીમાં ફસાઈ હતી. નેલ્લોર વિસ્તારમાં પણ બોટ ફસાઈ હોવાના અહેવાલ સામે આવ્યા હતા. જોકે, બંને ઘટનાઓમાં સવાર લોકોને સુરક્ષિત બચાવી લેવામાં આવ્યા હતા.
દરિયામાં ઊંચાં મોજાં અને તોફાની પવનને ધ્યાનમાં રાખીને વહીવટી તંત્રે માછીમારોને આગામી સૂચના ન મળે ત્યાં સુધી દરિયો ન ખેડવાની સલાહ આપી છે. દરિયાકાંઠાના નીચાણવાળા વિસ્તારોમાં રહેતા લોકોને પણ સાવચેત રહેવા જણાવાયું છે.
વાવાઝોડાની અસરથી રેલવે અને હવાઈ પરિવહન વ્યવસ્થા ખોરવાઈ છે. દક્ષિણ મધ્ય રેલવે અને પૂર્વ તટ રેલવે દ્વારા આશરે ૩૨ ટ્રેનો રદ કરવામાં આવી છે, જ્યારે કેટલીક ટ્રેનોના રૂટમાં ફેરફાર કરવામાં આવ્યો છે. ચેન્નાઈ એરપોર્ટ પરથી વિજયવાડા, રાજમુંદ્રી, કડપ્પા અને તિરુચિ જતી ઇન્ડિગોની ૧૧ ફ્લાઇટ્સ ૨ નવેમ્બરે રદ કરવામાં આવી હતી. વિજયવાડા, રાજમુંદ્રી, તિરુપતિ અને વિશાખાપટ્ટનમ એરપોર્ટ પર પણ કામગીરીને અસર પહોંચી છે.
મુસાફરોને એરલાઇન્સની સત્તાવાર વેબસાઇટ અને મોબાઇલ મેસેજ દ્વારા ફ્લાઇટની સ્થિતિ તપાસ્યા બાદ જ એરપોર્ટ પહોંચવાની સલાહ આપવામાં આવી છે. મુરાસુ વાવાઝોડાની અસર પાડોશી રાજ્ય તેલંગાણામાં પણ જોવા મળી રહી છે. ખમ્મમ, નલગોંડા, સૂર્યાપેટ, મહેબૂબનગર, વાનાપર્થી અને નાગરકુરનૂલ સહિતના જિલ્લાઓમાં ઓરેન્જ એલર્ટ જાહેર કરવામાં આવ્યું છે.
હૈદરાબાદ, રંગારેડ્ડી, મેડચલ અને વારંગલમાં પણ ભારે વરસાદની આગાહી કરવામાં આવી છે. વધુમાં, ૩થી ૫ નવેમ્બર દરમિયાન પહાડી વિસ્તારોના ઘાટ રોડ પર મુસાફરી ટાળવાની સલાહ આપવામાં આવી છે. ભારે વરસાદથી ભૂસ્ખલન અને પથ્થરો ધસી પડવાનું જોખમ વધી શકે છે.
આંધ્ર પ્રદેશના ખેડૂતો માટે મુરાસુ વાવાઝોડું વધુ એક મોટો પડકાર બનીને આવ્યું છે. અગાઉ ૨૮ અને ૨૯ ઑક્ટોબરે આવેલા ’અર્નબ’ ચક્રવાતથી થયેલા નુકસાનમાંથી ખેડૂતો હજુ બહાર આવ્યા નથી, ત્યાં ફરી ભારે વરસાદે મુશ્કેલીઓ વધારી છે. કૃષ્ણા, કાકીનાડા, શ્રીકાકુલમ, વિજયનગરમ અને પાર્વતીપુરમ મન્યમ સહિતના જિલ્લાઓમાં ખેતીને અસર થઈ છે. ડાંગર ઉપરાંત બાજરી, મગફળી, કપાસ, શેરડી અને બાગાયતી પાકોને નુકસાન થવાની આશંકા છે. ખેતરોમાં પાણી ભરાઈ રહેતાં ખેડૂતોને પાક સંપૂર્ણપણે બરબાદ થવાનો ભય સતાવી રહ્યો છે.
વાવાઝોડાની અસરને ધ્યાનમાં રાખીને સ્થાનિક વહીવટી તંત્ર દ્વારા દરિયાકાંઠાના વિસ્તારોમાં સુરક્ષા અને રાહત વ્યવસ્થા મજબૂત કરવામાં આવી રહી છે. ભારે વરસાદ, વાહનવ્યવહારની મુશ્કેલીઓ અને ખેતીના નુકસાનને કારણે આગામી દિવસોમાં પરિસ્થિતિ પર સતત નજર રાખવી જરૂરી બની છે.
