આ ઘટનાની જાણ વન વિભાગ અને પોલીસ વિભાગને કરવામાં આવતા, વન વિભાગનો સ્ટાફ તાત્કાલિક સ્થળ પર પહોંચ્યો હતો
Amreli, તા.૨૯
ગત સાંજે ધારી તાલુકાના ત્રંબકપુર ગામે દીપડાએ એક વર્ષની બાળકીને ફાડી ખાધાની કરુણ ઘટના પ્રકાશમાં આવી છે, જેના પગલે જંગલ કાંઠાના આ વિસ્તારમાં ભયનું વાતાવરણ ફેલાઈ ગયું છે. ધારી તાલુકાના ત્રંબકપુર ગામમાં રહેતા અને ખેતીનું કામ કરતા અર્જુન નિનામાનાં પત્ની ગઈકાલે સાંજે તેમના રહેણાંક મકાને ચૂલા પર રોટલી બનાવી રહ્યાં હતાં. તેમની બાળકી, જેનું નામ રિન્કુ છે, તે તેમની બાજુમાં જ બેઠેલી હતી. તે જ સમયે અચાનક એક કદાવર દીપડો ત્યાં આવી ચડ્યો અને માતાની નજર સામે જ બાળકીને ઊંચકીને નાસી ગયો હતો.પોતાની માસૂમ પુત્રીને બચાવવા માટે માતાએ હિંમત દાખવી અને તેમના હાથમાં રહેલા વેલણ સાથે દીપડાની પાછળ દોટ મૂકી હતી. તેમણે દીપડા પર વેલણનો ઘા કર્યો અને મદદ માટે બૂમો પાડી હતી. માતાનો અવાજ સાંભળીને આસપાસના અનેક લોકો તરત જ ઘટનાસ્થળે દોડી આવ્યા હતા. બાળકીને બચાવવાના પ્રયત્નોમાં સફળતા ન મળતાં, લોકોએ શોધખોળ શરૂ કરી.થોડે દૂરથી રિન્કુ નામની આ બાળકી મૃત હાલતમાં મળી આવી હતી, જ્યારે દીપડો સ્થળ પરથી ભાગી ગયો હતો. આ ઘટનાની જાણ વન વિભાગ અને પોલીસ વિભાગને કરવામાં આવતા, વન વિભાગનો સ્ટાફ તાત્કાલિક સ્થળ પર પહોંચ્યો હતો. આ માનવભક્ષી દીપડાને પકડવા માટે ઘટનાસ્થળે અને તેની આસપાસના વિસ્તારમાં કુલ ૭ પાંજરા મૂકવાની કવાયત હાથ ધરવામાં આવી છે. છેલ્લા એકાદ અઠવાડિયાથી પશુઓ દ્વારા નાના બાળકોને ઉઠાવી જઇને ફાડી ખાવાના બનાવો વધતા લોકોમાં ફફડાટ ફેલાયો છે.
