Surendranagar, તા.1
ચોટીલાના સબ ડિવિઝનલ મેજિસ્ટ્રેટ અને નાયબ કલેક્ટર એચ.ટી. મકવાણાએ ચોટીલા શહેરમાં ભારે વાહનોની અવરજવર પર પ્રતિબંધ મૂકતો આદેશ જારી કર્યો છે. શિવ શક્તિ સોસાયટી પાસે આવેલી કોર્ટની દિવાલથી મનહર પાર્ક સુધીના આંતરિક રોડ પર ડમ્પર, ટ્રક અને ટ્રેલર જેવા ભારે વાહનો 29 એપ્રિલ 2026 થી 29 જૂન 2026 સુધી પસાર થઈ શકશે નહીં.
આ નિર્ણય ભારતીય નાગરિક સુરક્ષા સંહિતા 2023ની કલમ 163 હેઠળ લેવામાં આવ્યો છે. આ રસ્તો રહેણાંક વિસ્તારમાં આવેલો છે અને તાજેતરમાં જ તેના પર સીસી રોડનું કામ કરવામાં આવ્યું છે. સ્થાનિક રહીશો, લોકો અને નાના બાળકોની અવરજવર અહીં સતત રહે છે.
ભારે વાહનોની અવરજવરથી રહેણાંક વિસ્તારમાં અકસ્માત થવાની સંભાવના છે, તેમજ નાના બાળકો અને સ્થાનિક રહીશોના જીવનને જોખમ ઊભું થઈ શકે છે. આ ઉપરાંત, નવા બનેલા રોડને નુકસાન થવાની અને ધૂળ તથા અવાજ જેવા પ્રદૂષણમાં વધારો થવાની પણ પૂરી સંભાવના છે.
આ તમામ સંભવિત જોખમોને ધ્યાનમાં રાખીને, સબ ડિવિઝનલ મેજિસ્ટ્રેટે ભારે વાહનો જેવા કે ડમ્પર, ટ્રક અને ટ્રેલરની અવરજવર પર સંપૂર્ણ પ્રતિબંધ ફરમાવ્યો છે.
