Kashmir, તા.7
દેશમાં હવે શરુ થયેલી શિયાળાની મોસમમાં હિમાલયના પહાડી વિસ્તારોમાં હિમવર્ષા વધી ગઇ છે અને મેદાની ક્ષેત્રોમાં ઉષ્ણતામાનનો પારો 5 ડીગ્રી સુધી નીચે પહોંચી ગયો છે. રાજસ્થાન, મધ્યપ્રદેશ, ઉત્તર પ્રદેશ, હિમાચલ, ઉત્તરાખંડ, બિહાર, ઝારખંડ, છતીસગઢ સહિતના રાજ્યોમાં કડાકાની ઠંડીનો અનુભવ થઇ રહ્યો છે. કાશ્મીરમાં ઉંચાઇવાળા વિસ્તારોમાં હિમવર્ષાને કારણે ઠંડી વધી ગઇ છે.
આગામી 15 દિવસ સુધી ભારે હિમવર્ષાની ચેતવણી આપવામાં આવી છે. ઉતરાખંડમાં પારો માઇનસ 9 સુધી પહોંચી ગયો છે અને પાઇપલાઇનોમાં પાણી બરફની જેમ જામી ગયું છે.મધ્યપ્રદેશના ભોપાલમાં જાન્યુઆરીની ઠંડીએ 10 વર્ષનો રેકોર્ડ તોડીને 3.8 ડીગ્રી સુધી ઠંડી નોંધાઇ હતી. જ્યારે છીંદવાડામાં ઉષ્ણતામાનનો પારો 2 ડીગ્રી સુધી નીચે પહોંચી ગયો હતો અને ભારે ધુમ્મસનું પણ વાતાવરણ હતું.
હવામાન વિભાગના જણાવ્યા મુજબ પહાડી વિસ્તારોમાં વધુ હિમવર્ષા અને ઉષ્ણતામાન વધુ નીચુ જઇ શકે છે. ખાસ કરીને જમ્મુ કાશ્મીર, હિમાચલ પ્રદેશ અને ઉત્તરાખંડમાં ભારે હિમવર્ષાની ચેતવણી આપવામાં આવી છે.તો પંજાબ, હરિયાણા સહિતના રાજ્યોમાં પણ કડાકાની ઠંડી સાથે વહેલી સવારે ભારે ધુમ્મસ અને હળવી હિમવર્ષા જેવી સ્થિતિ બનશે. જ્યારે મેદાની વિસ્તારોમાં વરસાદ પણ પડી શકે છે.
