New Jersey, તા.7
એક તરફ વેનેઝુએલા પરના હુમલાને લઈને અમેરિકા વિશ્વભરમાં વિવિધ પ્રતિક્રિયાઓનો સામનો કરી રહ્યું છે, તો બીજી તરફ અમેરિકામાં યોજાનારી મેયરની ચૂંટણીના પરિણામોને લઈને સોશિયલ મીડિયા પર ચર્ચા થઈ રહી છે.
તાજેતરમાં, અમેરિકાના ન્યુ જર્સીના નવા મેયરનું નામ જાહેર કરવામાં આવ્યું જે સાંભળીને અમેરિકાથી હજારો કિલોમીટર દૂર ભારતમાં ઉજવણી શરૂ થઈ ગઈ. ભારતીય મૂળના પુલકિત દેસાઈને ન્યુ જર્સીના નવા મેયર બનાવવામાં આવ્યા છે.
ન્યુ જર્સીના પાર્સિપનીમાં ઇતિહાસ રચતા પુલકિત દેસાઈએ મેયર તરીકે શપથ લીધા હતા. યુએસ મરીન સૈનિક અને લાંબા સમયથી ટેકનોલોજી ઉદ્યોગમાં કાર્યરત દેસાઈ આ પદ સંભાળનારા પ્રથમ ભારતીય-અમેરિકન અને પ્રથમ એશિયન-અમેરિકન છે.
દેસાઈની તાજપોશી પાર્સિપની મ્યુન્સિપલ બિલ્ડીંગ ખાતે એક ભાવનાત્મક સમારોહમાં કરવામાં આવી હતી જેમાં તેમના પરિવાર, સ્થાનિક સમુદાય અને ન્યુ જર્સીના ચૂંટાયેલા ગવર્નર માઈકી શેરિલની હાજરી હતી.
યુએસ મરીન કોર્પ્સમાં છ વર્ષ સુધી સેવા આપનાર દેસાઈએ ઓપરેશન્સ ડેઝર્ટ શીલ્ડ અને ડેઝર્ટ સ્ટોર્મ દરમિયાન પોતાની ફરજ બજાવી હતી. લશ્કરી સેવા પછી તેમણે લગભગ ત્રણ દાયકા સુધી ટેકનોલોજી ક્ષેત્રમાં કામ કર્યું. સાયબર સુરક્ષા અને વૈશ્વિક આઇટી સિસ્ટમ મેનેજમેન્ટમાં અનુભવ મેળવ્યો. હવે તેઓ આ અનુભવને નાગરિક વહીવટમાં પારદર્શિતા અને સારા શાસનમાં રૂપાંતરિત કરવા માંગે છે.
