Rajkot,તા.૧૫
જિલ્લાના ગોંડલ શહેરમાંથી એક ચોંકાવનારી અને શરમજનક ઘટના સામે આવી છે. ગોંડલ ડિવિઝનની ડીવાય એસપી કચેરી ખાતે ફરજ બજાવતા પોલીસ હેડ કોન્સ્ટેબલ ભગીરથસિંહ વાઘેલાના પોતાના રહેણાંક મકાનમાં જ મોટાપાયે જુગારધામ ચાલતું હોવાનો પર્દાફાશ થયો છે. રાજકોટ રેન્જ ડીઆઇજી નિર્લિપ્ત રાયની ટીમે બાતમીના આધારે દરોડો પાડીને લાખોની રોકડ સાથે ૧૩ મહિલાઓને જુગાર રમતા ઝડપી પાડી છે, જ્યારે આરોપી હેડ કોન્સ્ટેબલ ફરાર થઈ ગયો છે. આ ઘટના બાદ એસપી દ્વારા કડક પગલાં ભરીને હેડ કોન્સ્ટેબલને સસ્પેન્ડ કરી દેવામાં આવ્યા છે અને ડી-સ્ટાફના ૬ કર્મચારીઓની બદલી કરી દેવાતા પોલીસ બેડામાં ફફડાટ વ્યાપી ગયો છે.
સમગ્ર મામલાની વિગત એવી છે કે, રાજકોટ રેન્જ ડીઆઈજી નિર્લિપ્ત રાયની ટીમના પીએસઆઇ બી. સી. મિયાત્રાને ચોક્કસ માહિતી મળી હતી કે, ગોંડલ શહેરના ભવનાથ નગર દત્તાત્રેય મંદિર પાસે આવેલા પોલીસ હેડ કોન્સ્ટેબલ ભગીરથસિંહ વાઘેલાના મકાનમાં બહારથી લોકોને બોલાવીને તીન પત્તીનો જુગાર રમાડવામાં આવે છે. આ જુગારધામમાં રમાતી દરેક રમતમાંથી કમિશન પેટે નાળ પણ વસૂલવામાં આવતું હતું.
આ બાતમીના આધારે ૧૩ જુલાઈ ૨૦૨૬ના રોજ ડીઆઈજીની ટીમે મકાન પર ઓચિંતો દરોડો પાડ્યો હતો. દરોડા દરમિયાન મુખ્ય સૂત્રધાર પોલીસ હેડ કોન્સ્ટેબલ ભગીરથસિંહ સ્થળ પર હાજર ન મળી આવતા તેઓ ફરાર હોવાનું નોંધાયું છે, પરંતુ સ્થળ પરથી હેડ કોન્સ્ટેબલના પત્ની સહિત કુલ ૧૩ મહિલાઓ જુગાર રમતા રંગેહાથ ઝડપાઈ ગઈ હતી.
પોલીસે સ્થળ પરથી ૧,૩૫,૯૦૦ની રોકડ રકમ અને ૫૨ ગંજીપત્તાના પાનાં કબ્જે કર્યા છે. આ મામલે ગોંડલ સીટી બી ડિવિઝન પોલીસ સ્ટેશન ખાતે જુગાર ધારા હેઠળ ગુનો નોંધવામાં આવ્યો છે. પોલીસ હેડ કોન્સ્ટેબલના ઘરમાં જ જુગારધામ ચાલતું હોવાની આ ગંભીર ઘટનાની નોંધ લઈને રાજકોટ એસપી વિજયસિંહ ગુર્જર દ્વારા તાત્કાલિક અસરથી કડક કાયદાકીય અને વહીવટી પગલાં ભરવામાં આવ્યા છે.
આરોપી પોલીસ હેડ કોન્સ્ટેબલ ભગીરથસિંહ વાઘેલાને તાત્કાલિક પ્રભાવથી સસ્પેન્ડ કરી દેવામાં આવ્યો છે. આ ઉપરાંત, સ્થાનિક પોલીસની બેદરકારી અથવા મીલીભગત સામે આવતા એસપીએ ગોંડલ સીટી બી ડિવિઝન પોલીસ સ્ટેશનના સર્વેલન્સ સ્ક્વોડ (ડી સ્ટાફ)માં ફરજ બજાવતા છ જેટલા પોલીસ કર્મચારીઓની જાહેર હિતમાં પોલીસ હેડ ક્વાટર ખાતે બદલી કરી નાખી છે.
ઉલ્લેખનીય છે કે, રાજકોટ ગ્રામ્ય વિસ્તારમાં જુગારની પ્રવૃત્તિઓ સામે રેન્જ ડીઆઈજીની ટીમ સતત કડક કાર્યવાહી કરી રહી છે. આ ઘટનાના બે દિવસ પૂર્વે જ નિર્લિપ્ત રાયની ટીમે જસદણ પોલીસ સ્ટેશન વિસ્તારના ગઢાળા ગામ નજીક પણ એક મોટો દરોડો પાડ્યો હતો. જ્યાં ઘોડી-પાસાનો જુગાર રમતા ચાર આરોપીઓને ઝડપી લેવાયા હતા, જ્યારે પાંચ આરોપીઓ નાસી છૂટ્યા હતા. જસદણના દરોડા દરમિયાન પોલીસે રોકડ ૬૧,૧૦૦, ત્રણ મોબાઇલ, ઘોડી-પાસા, એક ઇકો કાર અને એક મોટરસાયકલ સહિત કુલ ૪,૭૧,૧૦૦નો મુદ્દામાલ કબ્જે કરીને ગુજરાત જુગાર અધિનિયમ હેઠળ વધુ તપાસ હાથ ધરી છે.
