ઉનાળો આવતાં જ ડ્રેસના કાપડ તથા સ્ટાઇલમાં ફેરફાર થાય છે

ઉનાળો આવતાં જ ડ્રેસના કાપડ તથા સ્ટાઇલમાં ફેરફાર થાય છે. આથી જ ગ્રીષ્મના આરંભ સાથે ફેશન ડિઝાઇનરો સમર કલેકશનની અવનવી શ્રેણી બજારમાં મૂકે છે. આ વર્ષે ગરમીની ઋતુમાં શોર્ટ ડ્રેસની હીટ ફેશન છે. આથી જ પ્રત્યેક તરુણીના વોર્ડરોબમાં શોર્ટ ડ્રેસ હોવા જરૂરી બની ગયા છે. એવું નથી હાલમાં ભારતમાં ઉનાળો હોવાથી આ  ફેશન પ્રચલિત બની છે. પરંતુ આંતરરાષ્ટ્રીયસ્તરે પણ શોર્ટ ડ્રેસનો જ ટ્રેન્ડ પ્રવર્તે છે આથી જ ઘણા ભારતીય ડિઝાઇનરોએ આંતરરાષ્ટ્રીય ટ્રેન્ડ સાથે તાલ મિલાવવા  ડ્રેસની લંબાઇ ઘટાડીને ઘુંટણ સુધીની કે તેનાથી પણ ઓછી કરી નાંખી છે.

શોર્ટ સ્કર્ટ કે ડ્રેસથી ગરમીથી તો રાહત મળે જ છે ઉપરાંત તે અત્યંંત સેક્સી પણ દેખાય છે. ઘેરદાર અથવા પ્લેટવાળો ડ્રેસ શરીર પર ચોંટતો નથી અને હરવા ફરવામાં પણ સહેલાઇ રહે છે. આ પ્રકારના ડ્રેસનું ગળું થોડું નીચું રાખવું તથા સુંવાળી પીઠ પર પરસેવાના રેલા ન ઉતરે તે માટે પાછળથી પણ નીચું ગળું હોય તેનું ધ્યાન રાખવું જોઇએ. આમ જોવા જાવ તો આવા  ડ્રેસથી એક કાંકરે બે પક્ષી માર્યા જેવું થાય છે, એક તો ગરમીથી રાહત થાય છે  ઉપરાંત શરીરની સુંદરતા પણ દર્શાવી શકાય છે.

હાલમાં સમાપ્ત થયેલા લેકમે ફેશનવીકમાં પણ અનેક કોશ્ચ્યુમ ડિઝાઇનરોએ શોર્ટ ડ્રેસની નવીનતમ શ્રેણી રજૂ કરી હતી. નીચા ગળાના પ્રિન્ટેડ ડ્રેસ અને શોર્ટ પિનાફોર્મ ઉપરાંત ફ્યુશીયા અને કેસરી જેવા ઘેરા રંગમાં જ્યોર્જટના સ્ટ્રેપી  અને લેયર્ડ ડ્રેસ ઉનાળામાં આકર્ષક દેખાય છે તે સાથે જ ગરમીથી પણ રાહત મળે છે. આ ડ્રેસમાં બસ્ટ લાઇન (છાતીની નીચેનો ભાગ) પાસે સિકવન્સ ભરેલી લેસ કે ક્રિસ્ટલનું ભરતકામ કરેલું હોય છે. આના કારણે ડ્રેસનો લુક એકદમ ‘ફુલ’ થઇ જાય છે. આ ઉપરાંત ઘેરદાર અથવા નાની-નાની પ્લેટ ભરેલા ઘુંટણ સુધીના સાટીન બોર્ડર લગાડેલા ડ્રેસ પણ પાર્ટી પ્રેમીમાનુનીઓની લેટેસ્ટ ફેશન બની  ગયા છે.

કોલકાતાની ડિઝાઇનર અગ્નિમિત્રા પોલે ભારે ફેબ્રિક અને ઘેરા રંગ સાથે ઉનાળા માટે ખાસ ‘રિગલ કલેકશન’ની શ્રેણી બનાવી છે. આ ડિઝાઇનરે પારંપરિક ભૂતાનીઝ ડ્રેસમાથી પ્રેરણા લઇ વર્તમાન ડિઝાઇન પ્રમાણેના સુંદર શોર્ટડ્રેસ તૈયાર કર્યા છે. અગ્નિમિત્રાએ બે- ત્રણ કાપડને મિક્સ મેચ કરીને આગવા ડ્રેસ બનાવ્યા છે. જેમ કે વેલ્વેટ, કોર્ડરોય કે સુંવાળા ઊન સાથે નેટ,  જ્યોર્જટ કે લાયક્રાનું ફ્યુઝન કરી તેના પર   ભરત ભરવામાં આવ્યું કે ગોલ્ડ ફોઇલ પ્રિન્ટીંગ કર્યું અથવા સિકવન્સ ભરવામાં આવ્યા હતા. આ પ્રકારે મિક્સ  એન મેચ કરેલા કાપડમાંથી બનેલા ડ્રેસ ખૂબ જ સુંદર હતા.