Chennai,તા.01
IPL 2025ની અગિયારમી મેચમાં ચેન્નઈ સુપર કિંગ્સે ગુવાહાટીમાં રાજસ્થાન રોયલ્સ સામે 6 રને હારનો સામનો કરવો પડયો હતો. હોમ ટીમ રાજસ્થાને સ્ટાર બેટર નીતીશ રાણાની 81 રનની ઇનિંગ્સની મદદથી નવ વિકેટ ગુમાવીને 182 રન ફટકાર્યા હતા.
કેપ્ટન ઋતુરાજ ગાયકવાડની 63 રનની ઇનિંગ્સની સાથે અંતિમ ઓવર્સમાં સ્ટાર ફિનિશર મહેન્દ્ર સિંહ ધોની (11 બોલમાં 16 રન) અને રવીન્દ્ર જાડેજા (બાવીસ બોલમાં 32 રન અણનમ)ની હાજરી હોવા છતાં ચેન્નઈની ટીમ 6 વિકેટે 176 રનનો સ્કોર કરી શકી હતી.
આ સીઝનમાં રાજસ્થાનની આ પહેલી જીત ચેન્નઈ માટે 100મી હાર બની હતી. ચેન્નઈ 100મી હાર મેળવનારી IPL ની સાતમી ટીમ બની છે. આ પહેલા દિલ્હી કેપિટલ્સ (134 હાર), પંજાબ કિંગ્સ (133 હાર), રોયલ ચેલેન્જર્સ બેન્ગલુરૂ (128 હાર), કોલકાતા નાઇટ રાઇડર્સ (118 હાર), મુંબઈ ઇન્ડિયન્સ (117 હાર) અને રાજસ્થાન રોયલ્સ (108 હાર) IPL માં હારની સેન્ચુરી કરી ચૂકી છે. IPL માં સતત નવમી વાર ચેન્નઈની ટીમ 180 કે એથી વધુનો ટાર્ગેટ ચેઝ કરવામાં નિષ્ફળ રહી હતી.
