(રવિ નિમાવત દ્વારા)
Morbi તા.૧૫
Morbi સાયબર ક્રાઇમ પોલીસને મોટી સફળતા મળી છે. સ્કૂલના વાલીઓના વોટ્સએપ ગ્રુપ હેક કરીને ધમકી આપી ખંડણી માંગનાર અને સ્કૂલ ફીના નામે રૂપિયા પડાવવાનો પ્રયાસ કરનાર આરોપીની ધરપકડ કરવામાં આવી છે. આરોપી સામે અગાઉ પણ વિવિધ જિલ્લાઓમાં સાયબર ઠગાઈ સહિત કુલ ૧૩ ગુનાઓ નોંધાયેલા હોવાનું તપાસમાં સામે આવ્યું છે.
સાયબર ક્રાઇમ પોલીસ સ્ટેશનમાં ૪ જુલાઈ, ૨૦૨૬ના રોજ નોંધાયેલા ગુનાની તપાસ દરમિયાન જાણવા મળ્યું હતું કે ફરિયાદીની પત્નીને સ્કૂલ સંચાલકના નામે ફોન કરીને ઓટીપી મેળવી તેમનું વોટ્સએપ હેક કરવામાં આવ્યું હતું. ત્યારબાદ વોટ્સએપ મારફતે ઈમોશનલ બ્લેકમેલ કરી રૂ.૩૦ હજાર પડાવવામાં આવ્યા હતા. એટલું જ નહીં, જાનથી મારી નાખવાની ધમકી આપી રૂ.૧૦ લાખની ખંડણી પણ માંગવામાં આવી હતી. આરોપીએ સ્કૂલના વાલીઓ તથા બ્યુટી પાર્લર સાથે સંકળાયેલા લોકોના વોટ્સએપ ગ્રુપ હેક કરી અન્ય લોકોને પણ ડરાવી-ધમકાવી રૂપિયા પડાવવાનો પ્રયાસ કર્યો હતો.
મોરબી સાયબર ક્રાઇમ પોલીસ ઇન્સ્પેક્ટર અને ટીમે ટેકનિકલ સર્વેલન્સ તેમજ હ્યુમન સોર્સના આધારે તપાસ આગળ વધારી હતી. તપાસમાં આરોપી અલગ-અલગ રાજ્યોમાં ટ્રેનના જનરલ ડબ્બામાં મુસાફરી કરીને પોલીસથી બચતો હોવાનું સામે આવ્યું હતું. આખરે ૧૪ જુલાઈ, ૨૦૨૬ના રોજ આરોપીની ધરપકડ કરવામાં આવી હતી. કોર્ટ દ્વારા આરોપીના ત્રણ દિવસના રિમાન્ડ મંજૂર કરવામાં આવ્યા છે અને વધુ તપાસ હાથ ધરવામાં આવી રહી છે.
પકડાયેલા આરોપીની ઓળખ પ્રિતેશ ઉર્ફે રોશી મહેશભાઈ પ્રજાપતી તરીકે થઈ છે. આરોપી ટ્રુકોલર મારફતે મહિલાઓના મોબાઇલ નંબર મેળવી ફોન કરતો અને ‘‘ભૂલથી તમારે ઓટીપી આવ્યો છે‘‘ કહી ઓટીપી મેળવી લેતો હતો. ત્યારબાદ વોટ્સએપ હેક કરીને સ્કૂલ સંચાલક બની વાલીઓને સ્કૂલ ફી ભરવા, ઈમોશનલ બ્લેકમેલ કરવા તેમજ ધાકધમકી આપી રૂપિયા પડાવતો હતો.
પોલીસ તપાસમાં આરોપી સામે અમરેલી, જૂનાગઢ, રાજકોટ, મોરબી, વલસાડ, સાબરકાંઠા, નવસારી સહિતના વિસ્તારોમાં સાયબર ઠગાઈ, આઈટી એક્ટ અને અન્ય ગુનાઓ મળી કુલ ૧૩ ગુનાઓ નોંધાયેલા હોવાનું બહાર આવ્યું છે. સાયબર ક્રાઇમ પોલીસે લોકોને અપીલ કરી છે કે અજાણ્યા વ્યક્તિના ફોન પર ક્યારેય પણ ઓટીપી શેર ન કરવો. સાવચેતી અને સતર્કતા જ સાયબર ગુનાઓથી બચવાનો સૌથી અસરકારક ઉપાય છે.
