New York, તા. 21
ફિફા વિશ્વ કપ 2026 સ્પેનની ખિતાબી જીત અને અર્જેન્ટીનાની હાર સાથે સમાપ્ત થઈ ગયો. દુનિયાની આ સૌથી મોટી ટૂર્નામેન્ટથી આખરે સૌથી વધુ આર્થિક ફાયદો કોને થયો? હવે આ વાતને લઈને ચર્ચા જામી છે.
ખરેખર, ફિફા વિશ્વ કપનું આર્થિક ચિત્ર બે ભાગમાં વહેંચાયેલું દેખાય છે. એક તરફ ફિફા છે, તો બીજી તરફ યજમાન દેશ અમેરિકા, કેનાડા અને મેક્સિકો છે. રિપોર્ટ અનુસાર, ફિફાને વિશ્વ કપથી આશરે રૂા.86 હજાર કરોડની આવક થઈ છે. બીજી તરફ, અમેરિકા અને કેનાડાને જંગી આર્થિક લાભ મળ્યો છે, જ્યારે મેક્સિકોને એટલો લાભ થયો નથી.
1.25 લાખ કરોડ રૂપિયાની કમાણી
ફિફા 2026 વિશ્વ કપ અને સમગ્ર 2023 થી 2026 ના કોમર્શિયલ સાયકલ વચ્ચે આશરે રૂા.1.25 લાખ કરોડની કમાણી કરી છે. આમાં માત્ર વિશ્વ કપથી થયેલી આવક રૂા.86 હજાર કરોડ છે. આ ફિફાના ઇતિહાસની સૌથી મોટી કમાણી છે. આ પહેલાં, ફિફાએ 2019-22 ના ચક્રમાં આશરે રૂા.73 હજાર કરોડની કમાણી કરી હતી.
યજમાન દેશોને થયો આ નફો-નુકસાન
વિશ્વ કપની યજમાની કરવી એ ગૌરવની વાત છે, પરંતુ યજમાન શહેરોને સ્ટેડિયમોના આધુનિકીકરણ, સુરક્ષા, પરિવહન, ટ્રાફિક વ્યવસ્થાપન, ફેન ઝોન, પોલીસ બળ અને અન્ય જાહેર સુવિધાઓ પર ભારે રોકાણ કરવું પડે છે.
અમેરિકા
* કુલ રોકાણઃ રૂા.10.60 લાખ કરોડ
*નફો : રૂા.28.91 લાખ કરોડ
અમેરિકાને સીધી રીતે કોઈ નફો થયો નથી, પરંતુ સમગ્ર અર્થતંત્રમાં સર્જાયેલી આર્થિક પ્રવૃત્તિઓ અને કમાણીથી તેને મોટો ફાયદો થયો છે.
કેનાડા
* કુલ રોકાણઃ રૂા.96.39 હજાર કરોડ
* નફોઃ રૂા.3.45 લાખ કરોડ
કેનાડાના અર્થતંત્રને આ વિશ્વ કપથી ઘણો લાભ થયો છે. ત્યાં આશરે 25 હજાર લોકોને રોજગારી મળી.
મેક્સિકો
* કુલ રોકાણઃ રૂા.1.92 લાખ કરોડ
* નફોઃ રૂા.1.75 લાખ કરોડ
મેક્સિકોને ધાર્યા મુજબનો આર્થિક નફો મળ્યો નથી. રિપોર્ટ અનુસાર, હોટલ, રેસ્ટોરન્ટ અને પ્રવાસન ક્ષેત્રને થોડો લાભ જરૂર થયો છે.
પુરસ્કાર રાશિ ફક્ત 5.8 ટકા
વિશ્વ કપ જીતનારી ટીમ સ્પેનને ઇનામી રકમ તરીકે આશરે રૂા.481 કરોડ મળ્યાં, જ્યારે ટૂર્નામેન્ટની કુલ ઇનામી રકમ આશરે રૂા.6,999 કરોડ હતી. પરંતુ જો ફિફાની કુલ કમાણી જોઈએ તો આ રકમ તેની કુલ કમાણીનો માત્ર 5.8 ટકા હિસ્સો જ થાય છે.
