New Delhi,તા.21,
ફિફા વર્લ્ડ કપ 2026 ફાઇનલ દરમિયાન લિયોનેલ મેસ્સી અને ક્રિસ્ટિયાનો રોનાલ્ડો પર પોતાનો અભિપ્રાય આપ્યા બાદ પાકિસ્તાનના ભૂતપૂર્વ ફાસ્ટ બોલર શોએબ અખ્તર સોશિયલ મીડિયા પર જોરદાર ટ્રોલ થયા હતા.
આર્જેન્ટિના અને સ્પેન વચ્ચેની ટાઇટલ મેચ દરમિયાન અખ્તર ટેપમેડ અને પીટીવીના ફૂટબોલ શોના પેનલમાં વિશ્લેષક તરીકે ઉપસ્થિત રહ્યા હતા. જોકે, તેમનો દેખાવ અને ફૂટબોલ પરની તેમની ટિપ્પણીઓ બંને ઘણા દર્શકોને પસંદ પડી ન હતી.
ચર્ચા દરમિયાન શોએબ અખ્તરે જણાવ્યું હતું કે, ફૂટબોલના ઇતિહાસમાં ક્રિસ્ટિયાનો રોનાલ્ડો કરતાં મોટી બ્રાન્ડ ક્યારેય બની નથી. છેલ્લા દાયકામાં FIFA અને વિશ્વભરની ઘણી મોટી ફૂટબોલ લીગે રોનાલ્ડોની લોકપ્રિયતાનો પૂરેપૂરો લાભ લીધો છે. તેમનો વ્યાપારી પ્રભાવ અને વૈશ્વિક ઓળખ તેમને રમત જગતનો સૌથી મોટો ચહેરો બનાવે છે.
જોકે, અખ્તરે એ પણ સ્પષ્ટ કર્યું હતું કે જો વાત ફક્ત ફૂટબોલની રમત અને ક્ષમતાની હોય, તો લિયોનેલ મેસ્સી એક અલગ જ કક્ષાના ખેલાડી છે. મેસ્સીનું બોલ કંટ્રોલ, મેદાન પરનો પ્રભાવ અને વિરોધી ખેલાડીઓને પોતાની તરફ ખેંચવાની ક્ષમતા અદ્ભુત છે.
અખ્તરે ઉમેર્યું કે રમતની બાબતમાં રોનાલ્ડો મેસ્સીની નજીક પણ નથી આવતા. તેમણે રોનાલ્ડોની ફિટનેસ અને સખત મહેનતની પ્રશંસા કરવા છતાં મેસ્સીને શ્રેષ્ઠ ખેલાડી ગણાવ્યા હતા.
આ નિવેદન બાદ સોશિયલ મીડિયા પર ચર્ચા જાગી હતી. યુઝર્સે એક ક્રિકેટર ફૂટબોલ પેનલમાં શું કરે છે તે અંગે સવાલો ઉઠાવ્યા હતા, જ્યારે મેસ્સી અને રોનાલ્ડોના ફેન્સ વચ્ચે `G.O.A.T’ મુદ્દે નવી બહેસ શરૂ થઈ હતી.
