Ahmedabad,તા.26
રાજ્યમાં પાનનાં ગલ્લા અને અન્ય સ્થળોએ મળતા ‘ગોગો પેપર’ (રોલિંગ પેપર) પર સરકાર દ્વારા લાદવામાં આવેલા પ્રતિબંધને પડકારતી અરજીમાં ગુજરાત હાઈકોર્ટે મહત્વનો વચગાળાનો આદેશ આપ્યો છે.
અદાલતે ગૃહ વિભાગના જાહેરનામાના આધારે નોંધાયેલી ફરિયાદ (FIR) પર સ્ટે ફરમાવી દીધો છે અને આ કેસની વધુ સુનાવણી આગામી દિવસોમાં મુકરર કરી છે.
શું છે હાઈકોર્ટનો આદેશ?
જસ્ટિસની ખંડપીઠે આ મામલે સુનાવણી કરતા અરજદાર વેપારીની તરફેણમાં મહત્વનો નિર્ણય લીધો હતો. કોર્ટે વેપારી પાસેથી જપ્ત કરવામાં આવેલા ગોગો પેપરના મુદ્દામાલને રૂ. 20,000ના પર્સનલ બોન્ડ પર મુક્ત કરવાનો પણ હુકમ કર્યો છે.
અરજદાર પક્ષ દ્વારા દલીલ કરવામાં આવી હતી કે સરકાર દ્વારા રોલિંગ પેપરની જપ્તી અને એફઆઈઆર જેવી કડક કાર્યવાહી કરવામાં આવી રહી છે, જે હકીકતમાં સરકારના સત્તાક્ષેત્રની બહારનો વિષય છે. સાથે જ, સરકારના જાહેરનામામાં ઘણી અસ્પષ્ટતા અને અધૂરી માહિતી હોવા અંગે પણ ગંભીર સવાલો ઉઠાવવામાં આવ્યા હતા.
સરકારનો પક્ષ અને જાહેરનામાની ગૂંચ
રાજ્ય સરકાર દ્વારા સૌપ્રથમ 16 ડિસેમ્બર, 2025ના રોજ ગોગો પેપર પર પ્રતિબંધ મૂકવામાં આવ્યો હતો. ત્યારબાદ, 7 ફેબ્રુઆરી, 2026ના રોજ નવા નિર્દેશો સાથે તમામ જિલ્લા મેજિસ્ટ્રેટને આ અંગે નવા જાહેરનામા બહાર પાડવા સૂચના અપાઈ હતી.
જોકે, કોર્ટમાં એવી વિગત સામે આવી હતી કે હજુ સુધી જિલ્લા મેજિસ્ટ્રેટ દ્વારા કોઈ નવા જાહેરનામા જારી કરવામાં આવ્યા નથી. સરકારનો બચાવ એવો હતો કે સગીરો અને યુવાનો દ્વારા ચરસ-ગાંજા જેવા નશાકારક પદાર્થોના સેવન માટે આ પેપરનો ઉપયોગ થતો હોવાથી પ્રતિબંધ જરૂરી છે.
વિવાદનું મૂળ
સરકારે કોર્ટમાં જણાવ્યું હતું કે તેઓ માત્ર ઉત્પાદન, વેચાણ અને સંગ્રહ બાબતે તપાસ કરી રહ્યા છે અને કોઈ આકરા પગલાં લેવાઈ રહ્યા નથી. પરંતુ અરજદારે પુરાવા સાથે જણાવ્યું કે સત્તાવાળાઓ દ્વારા વ્યાપક સ્તરે જપ્તી અને પોલીસ કેસ કરવામાં આવી રહ્યા છે. હાલમાં હાઈકોર્ટના આ સ્ટે ઓર્ડરને કારણે ગોગો પેપરના વેપારીઓને મોટી રાહત મળી છે, પરંતુ કાયદાકીય જંગ હજુ આગામી સુનાવણી સુધી ચાલુ રહેશે.
