રૂ. ૮૪.૩૧ લાખના ગાંજાના કેસમાં ફરાર લતીફ સમા પણ ઝડપાયો આરોપી સામે અગાઉ ૧૨ ગુના નોંધાયા છે
(નયના દવે દ્વારા)
Jamnagar તા.૧૭ઃ
Jamnagar જિલ્લાના કાલાવડ શહેરમાં જૂની અદાવતના કારણે એક યુવાન પર છરી સહિતના ઘાતક હથિયારો વડે હુમલો કરી ખૂનની કોશિશ કરવાના ચકચારી પ્રકરણમાં કાલાવડ ટાઉન પોલીસ, જામનગર એલસીબી અને એસઓજીની સંયુક્ત ટીમે પાંચ આરોપીઓને ઝડપી પાડવામાં સફળતા મેળવી છે. ઝડપાયેલા આરોપીઓ પૈકી મુખ્ય આરોપી અબ્દુલલતીફ ઓસમાણભાઈ સમા રાજકોટ જિલ્લાના જસદણ પોલીસ મથકમાં નોંધાયેલા રૂ. ૮૪.૩૧ લાખથી વધુના ગાંજા સહિતના મુદ્દામાલના નાર્કોટિક્સ કેસમાં પણ ફરાર હોવાનું સામે આવ્યું છે.
પોલીસની અખબારી યાદી મુજબ, ગત તા. ૧૩ ઓક્ટોબરની રાત્રે કાલાવડના કાશ્મીરપરા વિસ્તારમાં રહેતા મનોજભાઈ દિનેશભાઈ ગોહિલ પર છરી સહિતના હથિયારો વડે હુમલો કરવામાં આવ્યો હતો. આ બનાવ અંગે લતીફ ઓસમાણભાઈ સમા, મુનાફ ઉર્ફે મુસાભાઈ હારૂનભાઈ ઓડીયા, સુલતાન શેખ સહિતના શખ્સો સામે કાલાવડ ટાઉન પોલીસ મથકમાં ફરિયાદ નોંધાઈ હતી.
ફરિયાદની વિગતો મુજબ, ફરિયાદી મનોજભાઈના ભત્રીજા દિલીપ ગોહિલ એક યુવતીને ભગાડી ગયા હોવાના બનાવ બાદ આરોપીઓએ દિલીપને માર માર્યો હતો. આ બાબતે બંને પક્ષો વચ્ચે લાંબા સમયથી વાદવિવાદ ચાલતો હતો. આ અદાવતનો ખાર રાખીને આરોપીઓએ પૂર્વઆયોજિત કાવતરું રચી ગેરકાયદેસર મંડળી બનાવી છરી, ઘોકા અને પાઇપ જેવા ઘાતક હથિયારો સાથે મનોજભાઈ પર હુમલો કર્યો હોવાનો ફરિયાદમાં આક્ષેપ કરાયો છે. હુમલામાં મનોજભાઈને છરીના ઘા વાગતાં ગંભીર ઈજાઓ પહોંચી હતી. આ અંગે કાલાવડ ટાઉન પોલીસે બી.એન.એસ.ની કલમ ૧૦૯(૧) સહિતની વિવિધ કલમો હેઠળ ગુનો નોંધ્યો હતો.
આ ગંભીર બનાવને પગલે રાજકોટ રેન્જના નાયબ પોલીસ મહાનિરીક્ષક નિર્લિપ્ત રાય તથા જામનગર જિલ્લા પોલીસ અધિક્ષક ડૉ. રવિ મોહન સૈનીએ આરોપીઓને ઝડપી પાડવા સૂચના આપી હતી. જેના અનુસંધાને જામનગર ગ્રામ્ય વિભાગના નાયબ પોલીસ અધિક્ષક પિયુષ વાંદાના માર્ગદર્શન હેઠળ એલસીબી પીઆઈ વી.બી. ચૌધરી અને કાલાવડ ટાઉન પીઆઈ પી.ટી. જયસ્વાલ સહિતની ટીમોએ તપાસનો ધમધમાટ શરૂ કર્યો હતો.
પોલીસની અલગ અલગ ટીમોએ હ્યુમન સોર્સ અને ટેકનિકલ સેલની મદદથી આરોપીઓની હિલચાલ અંગે માહિતી એકત્ર કરી હતી. દરમિયાન ચોક્કસ બાતમીના આધારે કાલાવડ ટાઉન વિસ્તારમાં કબ્રસ્તાનના પાણીના ટાંકા નજીક સંયુક્ત ટીમોએ ઘેરાબંધી કરી પાંચેય આરોપીઓને ઝડપી લીધા હતા.
ઝડપાયેલા પાંચ આરોપીઓનાં નામઃ(૧) અબ્દુલલતીફ ઓસમાણભાઈ સમા સંધી (ઉં.વ. ૨૯), રહે. પંજેતરનગર, કાલાવડ.(૨) મુનાફ ઉર્ફે મુસાભાઈ હારૂનભાઈ ઓડીયા, રહે. કાલાવડ.(૩) સફાન શાબીર શેખ (ઉં.વ. ૩૧), રહે. કાલાવડ નાકા બહાર, જામનગર.(૪) મહમદફૈઝલ સલીમ ભગાડ (ઉં.વ. ૨૧), રહે. વિક્ટોરિયા પુલ, બારદાનવાળા પાસે, જામનગર.(૫) સુલતાનશા કરીમશા શેખ (ઉં.વ. ૩૧), રહે. કાશ્મીરપરા, કાલાવડ.
પોલીસ તપાસમાં બહાર આવેલી વિગતો મુજબ, ઝડપાયેલો અબ્દુલલતીફ ઓસમાણભાઈ સમા રાજકોટ ગ્રામ્યના જસદણ પોલીસ મથકમાં વર્ષ ૨૦૨૬ દરમિયાન નોંધાયેલા એનડીપીએસના ગુનામાં પણ ફરાર હતો. આ ગુનામાં ૧૦૮ કિલો ૩૩૧ ગ્રામ ગાંજો, જેની કિંમત રૂ. ૫૪,૧૬,૫૫૦ દર્શાવવામાં આવી છે, તથા અન્ય મુદ્દામાલ મળી કુલ રૂ. ૮૪,૩૧,૫૫૦નો મુદ્દામાલ સંકળાયેલો છે. આ કેસમાં આરોપી વિરુદ્ધ ધરપકડ વોરંટ પણ જારી કરવામાં આવ્યું હતું.
પોલીસના જણાવ્યા અનુસાર, અબ્દુલલતીફ સમા સામે કાલાવડ, જામનગર, રાજકોટ અને ખેડા જિલ્લાના વિવિધ પોલીસ મથકોમાં હત્યાના પ્રયાસ, મારામારી, લૂંટ, આર્મ્સ એક્ટ તથા એનડીપીએસ સહિતના કુલ ૧૨ ગુના અગાઉ નોંધાયેલા છે. જ્યારે અન્ય આરોપી મુનાફ ઉર્ફે મુસાભાઈ ઓડીયા સામે પણ પ્રોહિબિશન એક્ટ અને અન્ય ગુનાઓ સહિત કુલ આઠ ગુના નોંધાયેલા હોવાનું પોલીસે જણાવ્યું છે.
આ સમગ્ર કાર્યવાહીમાં એલસીબી પીઆઈ વી.બી. ચૌધરી, કાલાવડ ટાઉન પીઆઈ પી.ટી. જયસ્વાલ, એલસીબી પીએસઆઈ એમ.વી. ભાટિયા, એસઓજી પીએસઆઈ એલ.એમ. ઝેર, પીએસઆઈ એ.વી. ખેર તેમજ એલસીબી, એસઓજી અને કાલાવડ ટાઉન પોલીસના સર્વેલન્સ સ્ટાફે સંયુક્ત કામગીરી કરી હતી. પાંચેય આરોપીઓ સામે કાલાવડ ટાઉન પોલીસ દ્વારા આગળની કાયદેસરની કાર્યવાહી હાથ ધરવામાં આવી છે.
