સુરત મુખ્ય કાર્યક્રમ, અમદાવાદ, વડોદરા, રાજકોટનું ઓનલાઈન ઉદ્ઘાટન: ગુજરાત હાઈકોર્ટના તમામ જજો રહેશે ઉપસ્થિત
ચારેય સેન્ટરો માટે અધ્યક્ષ અને સભ્યોની નિમણૂક જાહેર: રાજકોટમાં પી.જી. ગોકાણી અધ્યક્ષ, ગુજરાત રાજ્ય કાનૂની સેવા મંડળે જાહેરનામું બહાર પાડ્યું
Rajkot,તા.28
રાજ્યની ન્યાય પ્રણાલીમાં એક ઐતિહાસિક અને ક્રાંતિકારી પગલું ભરાવા જઈ રહ્યું છે. રાજકોટ સહિત રાજ્યના ચાર મહાનગરો અમદાવાદ, રાજકોટ, સુરત અને વડોદરા ખાતે કાયમી લોક અદાલત સેન્ટરનું આવતીકાલે તા. 28મી ઓગસ્ટે ભવ્ય ઉદ્ઘાટન થવા જઈ રહ્યું છે. આ ઉદ્ઘાટન સમારોહનો મુખ્ય કાર્યક્રમ સુરત ખાતે યોજાશે, જ્યાં સુપ્રીમ કોર્ટના સીનિયર જસ્ટિસ વિક્રમનાથના વરદ હસ્તે આ કેન્દ્રનું લોકાર્પણ કરવામાં આવશે. જ્યારે અમદાવાદ, વડોદરા અને રાજકોટ ખાતેના સેન્ટરનું ઓનલાઈન માધ્યમથી લોકાર્પણ કરાશે.આ ઐતિહાસિક પ્રસંગે ગુજરાત હાઇકોર્ટના ચીફ જસ્ટિસ સહિત તમામ જજો ખાસ ઉપસ્થિત રહી આ ન્યાયિક પહેલને બિરદાવશે. આ સેન્ટરો કાર્યરત થવાથી રાજ્યની ન્યાય વ્યવસ્થામાં ઝડપ આવશે અને સામાન્ય નાગરિકને ઘર આંગણે જ ન્યાય મળતો થશે.
કાયમી લોક અદાલત શરૂ થવાથી રાજકોટ અને તેની આસપાસના નાગરિકોને અનેક મોટા ફાયદા થશે. સૌથી મોટો ફાયદો ઝડપી અને સસ્તો ન્યાય મળશે. સામાન્ય કોર્ટના વર્ષો સુધી ચાલતા ચક્કરમાંથી મુક્તિ મળશે અને પક્ષકારો વચ્ચે પરસ્પર સહમતીથી કેસોનો ઝડપી નિકાલ થશે. કોર્ટનું ભારણ નોંધપાત્ર રીતે વિવાદો અહીં ઝડપથી ઉકેલાશે. લોક અદાલતમાં સામાન્ય રીતે કોઈ કોર્ટ ફી હોતી નથી, જેથી ગરીબ અને મધ્યમ વર્ગના લોકો પર કોઈ આર્થિક બોજ પડતો નથી. આ સેન્ટર કાર્યરત થવાથી રાજકોટ જિલ્લા કોર્ટમાં પેન્ડિંગ કેસોનું ભારણ ઘટશે અને લોકોને ત્વરિત ન્યાય મળી રહેશે.ગુજરાત રાજ્ય કાનૂની સેવા સત્તા મંડળના સભ્ય સચિવ હેતલ એમ. પવાર દ્વારા બહાર પાડવામાં આવેલા જાહેરનામા મુજબ ચારેય કાયમી લોક અદાલતો માટે અધ્યક્ષ અને સભ્યોની નિમણૂક કરવામાં આવી છે.
1. અમદાવાદ: ક્લસ્ટરમાં અમદાવાદ અને ગાંધીનગર જિલ્લા. બેઠક અમદાવાદ (ગ્રામ્ય) ખાતે. અધ્યક્ષ તરીકે નિવૃત્ત મુખ્ય જિલ્લા ન્યાયાધીશ શ્રીમતી એચ. આઈ. ભટ્ટ અને સભ્યો તરીકે શૈલેષકુમાર દેસાઈ અને અલ્કેશ રાવલની નિમણૂક.2. રાજકોટ: ક્લસ્ટરમાં રાજકોટ જિલ્લો. બેઠક રાજકોટ ખાતે. અધ્યક્ષ તરીકે નિવૃત્ત મુખ્ય જિલ્લા ન્યાયાધીશ પી. જી. ગોકાણી અને સભ્યો તરીકે જયમીનભાઈ જે. ગાંધી અને પિયુષ મનહરલાલ મહેતાની નિમણૂક.3. સુરત: ક્લસ્ટરમાં સુરત અને તાપી @ વ્યારા. અધ્યક્ષ તરીકે નિવૃત્ત ફેમિલી કોર્ટના મુખ્ય ન્યાયાધીશ એસ. એમ. મહેતા અને સભ્યો તરીકે મહરૂખ ઝેડ. ચીચગર અને ડો. અનિષાબેન મહિડાની નિમણૂક.4. વડોદરા:* ક્લસ્ટરમાં વડોદરા જિલ્લો. અધ્યક્ષ તરીકે નિવૃત્ત મુખ્ય જિલ્લા ન્યાયાધીશ ડી. પી. ગોહિલ અને સભ્યો તરીકે ભાઈલાલભાઈ પરમાર અને નવનીત પરીખની નિમણૂક.જાહેરનામા મુજબ, નિયુક્ત અધ્યક્ષ અને સભ્યોને કોઈ વ્યક્તિગત કે નાણાકીય હિત ન હોવું જોઈએ. તેમની પ્રારંભિક નિમણૂક એક વર્ષ માટે રહેશે, જે પાંચ વર્ષ અથવા 65 વર્ષની વય બેમાંથી જે વહેલું હોય ત્યાં સુધી લંબાવી શકાશે. આ અંગે કાર્યકારી અધ્યક્ષનો નિર્ણય આખરી ગણાશે.
