Washington,તા.03
ટ્રમ્પ તંત્ર અમલમાં મૂકવા જઈ રહ્યું છે જેનાથી અમુક કેસમાં અસાયલમ માગનારા લોકોનો ઈન્ટરવ્યુ લીધા વિના જ તેમનો કેસ રિજેક્ટ કરી શકાશે. તાજેતરમાં જ કેટલાક ઈન્ટરનલ ફેડરલ ડોક્યુમેન્ટ્સમાં આ બાબતનો ઉલ્લેખ કરવામાં આવ્યો છે.
હવે આ નવા પ્લાનથી જેમને અમેરિકામાં એક વર્ષથી વધુ સમય થઈ ગયો છે તેવા લોકોને સૌથી વધુ અસર થવાની છે. અત્યારસુધી અસાયલમ માગતા લોકોનો ઈન્ટરવ્યુ કરવો ફરજિયાત હતો પરંતુ આ પ્રસ્તાવિત નિયમ હેઠળ અધિકારીઓને ઈન્ટરવ્યુ લીધા વિના જ અસાયલમ એપ્લિકેશન રિજેક્ટ કરવાની સત્તા આપવામાં આવશે.
જે લોકોએ અમેરિકામાં લીગલ એન્ટ્રી લીધી હોય તેઓ એક વર્ષના સ્ટે દરમિયાન ગમે ત્યારે અફેરમેટિવ અસાયલમ માટે એપ્લાય કરી શકે છે. તેના માટે એપ્લિકેશન કરવાની હોય છે, ત્યારબાદ ઈન્ટરવ્યુ થાય છે. જો અસાયલમ એપ્લિકેશન રિજેક્ટ થાય તો મામલો ઈમિગ્રેશન કોર્ટમાં પહોંચે છે.
2024 સુધીમાં અમેરિકા આવ્યાને એક વર્ષ થઈ ગયું હોય ત્યારબાદ પણ ઘણા લોકો અસાયલમ માટે એપ્લિકેશન કરતા હતા, તેના માટે આટલું મોડું કેમ થયું તેનો યોગ્ય ખુલાસો આપવા પર તેમની એપ્લિકેશન સ્વીકારી પણ લેવામાં આવતી હતી.
હવે અમેરિકામાં એક વર્ષના સ્ટે બાદ જે પણ ઈમિગ્રન્ટ અસાયલમ માગશે તેની એપ્લિકેશન રિજેક્ટ કરીને તેની સામે ડિપોર્ટેશન પ્રોસિડિંગ શરૂ કરી દેવાશે. ડિપોર્ટેશનથી બચવા માટે આ ઈમિગ્રન્ટને કોર્ટમાં જવું પડશે પરંતુ હાલના સંજોગોમાં તો ત્યાંથી પણ રાહત મળવાની લગભગ કોઈ શક્યતા નથી.
અમેરિકાના કાયદા અનુસાર દેશમાં એક વર્ષથી વધુ સમયથી રહેતો લીગલ કે ઈલીગલ ઈમિગ્રન્ટ અસાયલમ નથી માગી શકતો પરંતુ આ કાયદામાં અમુક અપવાદો પણ રાખવામાં આવ્યા છે.
