New Delhi, તા. 16
ફિફા વર્લ્ડ કપ 2026માં ભલે ભારતીય ટીમ ભાગ નથી લઈ રહી, પરંતુ ભારતીય મૂળનાં ખેલાડી નિશાન વેલુપિલ્લઈએ આ પ્રતિષ્ઠિત ટૂર્નામેન્ટમાં ડેબ્યૂ કરીને ભારતનું નામ રોશન કર્યું છે.
તુર્કી સામે રમાયેલી ગ્રુપ મેચમાં ઓસ્ટ્રેલિયા તરફથી રમતા 25 વર્ષીય નિશાને 61મી મિનિટે સબસ્ટિટ્યુટ તરીકે મેદાન પર પ્રવેશ કર્યો હતો. એંગ્લો-ઇન્ડિયન માતાનાં પુત્ર અને ઓસ્ટ્રેલિયાનાં ઉભરતા સ્ટાર ગણાતાં નિશાને મેચ દરમિયાન શાનદાર ડિફેન્સનું પ્રદર્શન કર્યું હતું, જેનાં કારણે તુર્કીના ખેલાડીઓ ગોલ કરવામાં નિષ્ફળ રહ્યાં હતાં અને ઓસ્ટ્રેલિયાએ 2-0થી જીત મેળવી હતી.
મુખ્ય કોચ ટોની પોપોવિચે નિશાનના ક્વાલિફાયર મેચોના શાનદાર પ્રદર્શનને જોઈને જ તેને 26 સભ્યોની અંતિમ ટીમમાં સ્થાન આપ્યું હતું. નિશાન અત્યાર સુધી ઓસ્ટ્રેલિયા માટે કુલ 8 આંતરરાષ્ટ્રીય મેચ રમી ચૂક્યો છે અને તેમાં તેણે ત્રણ મહત્વપૂર્ણ ગોલ પણ નોંધાવ્યા છે.
વર્ષ 2024માં ચીન સામેની ડેબ્યૂ મેચમાં મેદાન પર આવ્યાની માત્ર 7 મિનિટમાં જ ગોલ કરીને તે ચર્ચામાં આવ્યો હતો. આ વર્લ્ડ કપ મેચમાં ઓસ્ટ્રેલિયા તરફથી નેસ્ટોરી ઈરાનકુંડાએ 27મી મિનિટે અને કોનર મેટકલાફે 75મી મિનિટે ગોલ કરીને 24 વર્ષ પછી વર્લ્ડ કપમાં વાપસી કરી રહેલી તુર્કીની ટીમને પરાજય આપ્યો હતો.
