ફેશનની પરિભાષા દરરોજ બદલાતી રહે છે, પણ જેટેકની ફેશન ક્યારેય બદલાતી નથી. જેકેટની ફેશન ક્યારેય જૂની પણ નથી થતી. યુવાનોમાં હંમેશા જેકેટ હોટ ફેવરિટ રહ્યાં છે. જેકેટ લેધરનું હોય, ડેનિમનું હોય કે પછી ઊનનું હોય, શિયાળામાં દરેક પ્રકારનાં જેકેટ ઠંડી સામે રક્ષણ આપવાની સામે તમારા વ્યક્તિત્વને આકર્ષક લૂક પણ આપશે. ફેશનની દ્રષ્ટિએ જોઈએ તો જેકેટથી જ તમે પરફેક્ટ વિન્ટર લૂક મેળવી શકશો. જો બ્રાન્ડેડ જેકેટ હોય તો તેને પહેરવાની મઝા જ કંઈક અલગ હોય છે. દરેક વર્ષે જેકેટમાં નવી ડિઝાઈનનો સમાવેશ થાય છે. એટલે જો તમે સીઝન પહેલાં નવા ફેશન ટ્રેન્ડ વિશે માહિતી મેળવી લો તો તમે સ્ટાઈલિશ લૂકવાળું જેકેટ ખરીદી શકો. ફીમેલ જેકેટનો લૂક જેન્ટ્સ જેકેટના લૂકથી અલગ હોય છે. ફીમેલ જેકેટમાં ફર, ફ્રીલ કે પછી અન્ય કાપડથી બનાવેલ ડિઝાઈનર કોલર નાંખવામાં આવે છે જે ખૂબ ડિસન્ટ લૂક આપે છે.
અત્યારે જાડા ફેબ્રિકવાળા જેકેટ ટ્રેન્ડમાં નથી. પાતળા મટીરિયલવાળા જેકેટની ફેશન છે. અત્યારે ફેશનમાં છે તેવા પાતળા ફેબ્રિકમાં લાઈક્રા, વૂલન, આર્ટિફિશિયલ લેધરનો સમાવેશ થાય છે.
ડેનિમ જેકેટ્સ
ડેનિમ જેકેટ્સ બહુ કેઝ્યુઅલ લૂકના હોય છે. તે સિવાય સિમ્પલ, સ્ટાઈલિશ અને રફ એન્ડ ટફ લૂક માટે પણ યંગસ્ટર્સ તેને પસંદ કરે છે. ડેનિમ જેકેટમાં બ્લૂ, ઓફ વ્હાઈટ અને બ્લેક સૌથી વધારે ડિમાન્ડમાં હોય છે. ડેનિમ જેકેટ્સને સ્ટોન વોશ અને બ્લિચ લૂકવાળા કોઈ પણ જિન્સ સાથે કંબાઈન કરી પહેરી શકાય છે.
ડેનિમ જેકેટ અને જિન્સનું કોમ્બિનેશન પરફેક્ટ કેઝ્યુઅલ લૂક આપે છે. જેકેટની નીચે કોન્ટ્રાસ્ટ કલરની ટી-શર્ટ તમારા લૂકને વધુ આકર્ષક બનાવશે. તમે ડેનિમ જેકેટ સાથે ચેરી, બ્રાઉન, પિંક, ગ્રીન વગેરે જેવા રંગોનું કોમ્બિનેશન ટ્રાય કરી શકો છો. જેકેટ જિન્સ સાથે સ્પોર્ટ્સ શૂઝ વધારે સારા લાગશે.
લેધર જેકેટ
પુરુષ કરતાં મહિલાઓમાં લેધર જેકેટનું ચલણ વધારે છે. સિમ્પલ ટેક્સચરમાં લેધર જેકેટ ક્લાસિક લાગે છે. આમાં મેટ એટલે કે ચમક વિનાના અથવા શાઈન-ચમકદાર ફિનિશનો ઉપયોગ પણ કરી શકો છો. ક્રોકોડાઈલ સ્કિન, ફિશ સ્કેલ્સ અથવા સેલ્ફ ડિઝાઈનની ઈફેક્ટવાળા જેકેટ ગ્રેસફુલ લાગે છે. એક્રેલિક ટ્રાન્સફર્જ, પેચ, ચેઈન, બટન્સ, બકલ્સ, બકલ્સ અને સ્ટ્રેપ્સથી શણગારેલી ડિઝાઈન તમને વી શેપ અને હાઈનેકમાં મળી જશે. લેધર જેકેટ સાથે ટાઈટ જિન્સ સાથે વધારે સારું લાગે છે. જેકેટની નીચે પહેરવાના ટી-શર્ટ કોન્ટ્રાસ્ટ રંગના નહીં, મેચિંગ રંગના પહેરો. એની સાથે પગમાં લેધર શૂઝ પહેરવાથી પરફેક્ટ લૂક મળી જશે. તમે લોન્ગ બ્લેક શૂઝ પણ ટ્રાય કરી શકો છો. તમે થોડો વધારે ગ્લેમરસ લૂક મેળવવા માટે ગળામાં મફલર કે સ્કાર્ફ પણ પહેરી શકો છો.
પોલો જેકેટ
જેકેટની સુંદરતા, તેના રંગ, કટ અને તેના ફિટિંગ પર હોય છે. જો તમે ફિટ ડ્રેસ પહેરવાનું પસંદ કરો છો તો પોલો જેકેટ તમારા માટે બેસ્ટ છે. બ્લૂ, રેડ, યલો, વ્હાઈટ, પર્પલ અને ઓરેન્જ કલર્સનાં આ જેકેટ તમારી પર્સનાલિટીમાં નિખાર લાવે છે. ડબલ શેડ્સ, સ્ટ્રાઈપ્સ અને પ્રિન્ટ્સમાં પણ પોલો જેકેટ સારો લૂક આપે છે. પોલો જેકેટ જિન્સ કે સ્કર્ટ, દરેક ગારમેન્ટ સાથે સારો લૂક આપે છે.
