Tiruvallur,તા.૨૨
Tamil Naduના તિરુવલ્લુર જિલ્લામાંથી મોટા સમાચાર આવી રહ્યા છે. પેરિયાપલયમ નજીક મંજંગરણાઈમાં એક ખાનગી સીફૂડ પ્રોસેસિંગ યુનિટમાં એમોનિયા ગેસ લીકેજ થયો હતો. એમોનિયા ગેસ લીકેજને કારણે ફેક્ટરીમાં કામ કરતા કામદારોની હાલત બગડવા લાગી. અસરગ્રસ્ત કામદારોને તાત્કાલિક નજીકની હોસ્પિટલોમાં દાખલ કરવામાં આવ્યા હતા. પોલીસના જણાવ્યા અનુસાર, એક ખાનગી સીફૂડ પ્રોસેસિંગ યુનિટમાં એમોનિયા ગેસ લીકેજમાં બે લોકોના મોત થયા છે.
Tamil Nadu સરકારે અહેવાલ આપ્યો છે કે તિરુવલ્લુર જિલ્લામાં એક ખાનગી ફિશ મીલ નિકાસ કરતી ફેક્ટરીના ઉત્પાદન એકમમાં એમોનિયા ગેસ લીકેજથી બે મહિલાઓના મોત થયા છે અને ૬૨ અન્ય લોકો પ્રભાવિત થયા છે. આ ઘટના પેરિયાપલયમ નજીકના કાનિગૈપૈર ગામમાં બની હતી. સરકારી પ્રેસ રિલીઝ અનુસાર, તમિલનાડુના મુખ્યમંત્રી વિજય રૂપાણીએ ઔદ્યોગિક સલામતી અને આરોગ્ય નિયામક, પ્રદૂષણ નિયંત્રણ બોર્ડના સભ્ય સચિવ અને જાહેર આરોગ્યના અધિક નિયામકની બનેલી ત્રણ સભ્યોની સમિતિની રચના કરવાનો નિર્દેશ આપ્યો છે. તેમણે ૨૪ કલાકની અંદર વચગાળાનો અહેવાલ અને ત્રણ દિવસમાં અંતિમ અહેવાલ રજૂ કરવાનો આદેશ આપ્યો છે.
અગાઉ, પોલીસે મૃત્યુઆંક સાત હોવાનું જણાવ્યું હતું, પરંતુ સીએમઓ અને આરોગ્ય પ્રધાન કે.જી. અરુણરાજાએ પાછળથી આપેલા પ્રકાશનમાં આ આંકડો બે કર્યો હતો. આરોગ્ય પ્રધાન અરુણરાજે કહ્યું કે આટલી તીવ્રતાનો એમોનિયા ગેસ લીકેજ પહેલાં ક્યારેય થયો નથી. “ડોક્ટરો કહે છે કે અમે બીજે ક્યાંય આટલું ઊંચું સ્તર જોયું નથી,” મંત્રીએ કહ્યું. તેમણે એમ પણ કહ્યું કે કેટલાક દર્દીઓની હાલત બગડી રહી છે, અને ગંભીર રીતે બીમાર દર્દીઓને ખાનગી હોસ્પિટલોમાંથી સરકારી હોસ્પિટલોમાં ખસેડવામાં આવ્યા છે. તેમણે કહ્યું કે મૃત જાહેર કરાયેલા બે દર્દીઓની ખાનગી હોસ્પિટલોમાં સારવાર કરવામાં આવી હતી.
“એક વ્યક્તિને ખાનગી હોસ્પિટલમાં મૃત લાવવામાં આવ્યો હતો, અને બીજાનું સારવાર દરમિયાન મૃત્યુ થયું હતું,” આરોગ્ય મંત્રીએ જણાવ્યું. મંત્રીના જણાવ્યા અનુસાર, ૨૮ દર્દીઓ વેલ્સ મેડિકલ કોલેજમાં, ૧૮ વેંકટેશ્વર હોસ્પિટલમાં, ૧૦ રાજીવ ગાંધી સરકારી હોસ્પિટલમાં અને ૭ સરકારી સ્ટેનલી હોસ્પિટલમાં દાખલ છે. અચાનક ગેસ લીકેજથી ફરજ પરના કુલ ૬૪ કર્મચારીઓ પ્રભાવિત થયા હતા, જેમાં ૬૦ મહિલાઓ અને ચાર પુરુષોનો સમાવેશ થાય છે.
મુખ્યમંત્રી વિજયે મૃતકોના પરિવારોને મુખ્યમંત્રી રાહત ભંડોળમાંથી દરેકને ૨ લાખની સહાયની જાહેરાત કરી. મુખ્યમંત્રીએ મૃતકોના મૃતદેહને અંતિમ સંસ્કાર માટે સરકારી ખર્ચે તેમના ગૃહ રાજ્યોમાં પહોંચાડવાનો પણ આદેશ આપ્યો. એક સરકારી પ્રેસ રિલીઝમાં જણાવાયું છે કે આવી ઘટનાઓ ફરીથી ન બને તે માટે, સરકારે તમામ જોખમી ઉદ્યોગોનું તાત્કાલિક સંયુક્ત નિરીક્ષણ ફરજિયાત કર્યું છે.
રાષ્ટ્રપતિ દ્રૌપદી મુર્મુએ પણ આ દુર્ઘટના પર શોક વ્યક્ત કર્યો. ટિ્વટર પર એક પોસ્ટમાં તેમણે કહ્યું, “તમિલનાડુના તિરુવલ્લુર જિલ્લામાં એક ફેક્ટરીમાં થયેલા દુઃખદ અકસ્માતમાં થયેલા લોકોના મોત વિશે સાંભળીને મને ખૂબ જ દુઃખ થયું છે. હું પીડિતોના પરિવારો પ્રત્યે મારી ઊંડી સંવેદના વ્યક્ત કરું છું. મારા વિચારો અને પ્રાર્થનાઓ આ દુર્ઘટનાથી પ્રભાવિત તમામ લોકો સાથે છે. હું ઘાયલોના ઝડપથી સ્વસ્થ થવાની કામના કરું છું.”
પ્રધાનમંત્રી કાર્યાલય દ્વારા જારી કરાયેલા એક નિવેદનમાં કહેવામાં આવ્યું છે કે, “તમિલનાડુના તિરુવલ્લુર જિલ્લામાં થયેલા અકસ્માતમાં થયેલા લોકોના મોત વિશે સાંભળીને મને ખૂબ જ દુઃખ થયું છે. જેમણે પોતાના પ્રિયજનો ગુમાવ્યા છે તેમના પ્રત્યે મારી સંવેદના. હું ઘાયલોના ઝડપથી સ્વસ્થ થવાની પ્રાર્થના કરું છું.”
આ દરમિયાન, રાજ્યપાલ રાજેન્દ્ર વિશ્વનાથ આર્લેકરે ’એકસ’ પર શોકગ્રસ્ત પરિવારો પ્રત્યે સંવેદના વ્યક્ત કરી. રાજ્યપાલે લખ્યું, “તિરુવલ્લુર જિલ્લાના પેરિયાપલયમ નજીક કાનીગાઈપૈર ગામમાં ઝીંગા પ્રોસેસિંગ ફેક્ટરીમાં એમોનિયા ગેસ લીકેજની દુઃખદ ઘટનાથી હું ખૂબ જ દુઃખી છું, જેમાં અનેક લોકોના મોત થયા હતા અને અનેક કામદારો ઘાયલ થયા હતા.”
