Ribada. તા.23
રિબડામાંથી ગેસ રિફલિંગનું મોટું કૌભાંડ રૂરલ એસઓજીની ટીમે પકડી રૂ.16 લાખના 600 બાટલા જપ્ત કરી મોટી કાર્યવાહી કરી હતી. ઉમિયા ગેટ નં.4 માં સ્થિત સાંઇ પ્રેમ ગેસ એજન્સીમાં બે ગેસના બાટલાંથી ત્રણ-ત્રણ કિલો ગેસ કાઢી ત્રીજો બાટલો ભરી કાળાબજારી થતી હોવાનું સામે આવતા ખળભળાટ મચી ગયો હતો. પોલીસે હાલ ગેસ એજન્સીના મેનેજર સહિત ચાર શખ્સોની ધરપકડ કરી સંચાલક અને ગોડાઉન માલિકની શોધખોળ આદરી છે.
રાજકોટ એસપી વિજયસિંહ ગુર્જર દ્વારા એલ.પી.જી. ગેસના સીલીન્ડર્સને સંબંધિત ગેરકાયદેસરની પ્રવુતી સદંતર નાબુદ કરી અસરકારક કામગીરી કરવાની આપેલ સુચનાથી એસઓજી પીઆઈ એફ.એ.પારગીની રાહબરીમાં પીએસઆઇ જી. જે.ઝાલા ટીમ સાથે પેટ્રોલિંગમાં હતાં.
ત્યારે રીબડા ઇન્ડસ્ટ્રિયલ એરીયામાં આવેલ ઉમિયા ગેટ નં.4 અંદર સ્થિત સાંઇ પ્રેમ ગેસ એજેન્સીમાં એલ.પી.જી.ગેસ સિલીન્ડરની કાળાબજારી કરી અન્યની જીંદગી જોખમાય તે રીતે ફાયર સેફ્ટી નોર્મ્સનું પાલન કર્યા વિના અનઅધિકૃત રીફિલિંગ કરતા હોવાની કોન્સ્ટેબલ રણજીતભાઈ ધાંધલ તથા વિપુલભાઇ ગોહેલને મળેલ ચોક્કસ બાતમીના આધારે રિબડા પાસે ઉમિયા ગેટ નં.4 અંદર સ્થિત સાંઇ પ્રેમ ગેસ એજેન્સીમાં ડમી ગ્રાહક મોકલી દરોડો પાડ્યો હતો.
એસઓજીની ટીમે ગેસ એજન્સીમાંથી અલગ-અલગ કંપનીના નાના-મોટા ભરેલા તથા ખાલી એલ.પી.જી. ગેસ સિલીન્ડર 600 નંગ સહિત સમગ્ર ગોડાઉન સિઝ કરી આરોપી મેનેજર પંકજ જેઠા મકવાણા (ઉ.વ.38, રહે. રાજકોટ મવડી પાળ રોડ, મીરાબાઇ ટાઉનશીપ, મૂળ ગામ-નવાણીયા, બાબરા), લખમણ ચના ચાવડા (ઉ.વ.31, રહે. ગણેશનગર મફતીયાપરા, શાપર, મુળ ગામ-દેરોદર, પોરબંદર) અને રામ ચના ચાવડા (ઉ.વ.28, રીબડા ગામની સીમ, ઉમીયા ઇન્ડ્રસ્ટ્રીઝ, સાંઇ પ્રેમ ગેસ એજન્સી, મુળ ગામ દેરોદર, પોરબંદર) તેમજ રાકેશ અરવિંદ કુબાવત (ઉ.વ.48, ગુંદાસરા ગામની સીમ, હરસીધ્ધી પાર્ક, રીબડા રેલ્વે સ્ટેશન પાસે, મુળ ગામ-જીંજુડા, મેદરડા) ની ધરપકડ કરી અલગ અલગ કંપનીના 600 થી વધું ગેસના બાટલા રૂ.16 લાખનો મુદામાલ કબ્જે કરી કાર્યવાહી આદરી હતી.
જ્યારે સાંઈ પ્રેમ ગેસ એજન્સીનો સંચાલક બાબાભાઇ બગ્ગા (રહે. કલ્પવન સોસા., ઢોલરા, મુળ- નોઇડા (યુ.પી.) અને શૈલેષ ઉર્ફે હસમુખ ભાલાણી (રહે. મોરબી) તેમજ ગોડાઉન માલીક નિરવ ભરત ભીમાણી (રહે. માણાવદર) પોલીસ પકડથી દૂર રહેતાં તેની શોધખોળ હાથ ધરાઈ છે.વધુમાં પોલીસે જણાવ્યું હતું કે, આરોપીઓએ એલ.પી.જી. ગેસ સિલીન્ડર્સનું અનઅધિકૃત રિફીલિંગ કરી ગેસ સિલીન્ડર્સનું નિર્ધારીત બજારભાવ કરતા ઉંચા ભાવે વેચાણ કરતાં હતાં.
તેમજ ફાયર સેફ્ટીની જોગવાઇઓનો ભંગ કરી ઘર વપરાસના ગેસ સિલીન્ડર્સનું કોમર્શિયલ હેતુથી વેચાણ થતું હતું. તેમજ પકડાયેલ શખ્સો છેલ્લા ત્રણ વર્ષથી આ એજન્સી ચલાવી બે ગેસના બાટલાંથી ત્રણ-ચાર કિલો ગેસ કાઢી ત્રણ ગેસના બાટલા તૈયાર કરતાં હતાં. ઉલ્લેખનીય છે કે, ગેસ એજન્સીમાં સ્ટોક રજીસ્ટર જાળવણીની જોગવાઇઓનો ભંગની સાથે બિન અધિકૃત રીતે અન્ય કંપનીના તથા કંપનીના નામ વગરના ગેસ સિલિન્ડર્સનો ગેરકાયદેસર સ્ટોક કરવામાં આવતો હતો.
4 કિલો ના 1 હજારના 1500, 12 કિલોના 1500 ના 2500 અને 21 કિલોના 2500 ના 3500
રાજકોટ ગ્રામ્ય એસોજીની ટીમે રીબડા પાસે આવેલ ઇન્ડસ્ટ્રીયલ ઝોનમાં દરોડો પાડી ગેરકાયદેસર ગેસ રિફલિંગ કરી કાળાબજારીના કૌભાંડનો પર્દાફાશ કર્યો હતો. જેમાં ખુલાસો થયો હતો કે, આરોપીઓ 4 કિલો ગેસના બાટલાના રૂ.1 હજારની જગ્યાએ 1,500, 12 કિલોના રૂ.1500 ની જગ્યાએ 2,500 અને 21 કિલોના રૂ.2500 ની જગ્યાએ 3500 રૂપિયા પડાવી કાળા બજારી કરતાં હોવાનું સામે આવ્યું છે.
