Vadodara તા.૧૨
શહેરમાં સાયબર ગુનેગારોનો આતંક સતત વધી રહ્યો છે. Vadodaraના વાસણા રોડ પર હરીનગર ખાતે રહેતા એક ઇન્સ્યોરન્સ કંપનીના નિવૃત્ત અધિકારીને સીબીઆઈ, પોલીસ અને કોર્ટના જજનો ડર બતાવી સાયબર ઠગોએ સતત ૧૮ દિવસ સુધી ‘ડિજિટલ એરેસ્ટ’ કરી રાખ્યા હતા. આ સમય દરમિયાન વેરિફિકેશનના બહાને નિવૃત્ત અધિકારી પાસેથી આશરે ૧.૫૯ કરોડની માતબર રકમ પડાવી લેવામાં આવી હોવાની ચોંકાવનારી ફરિયાદ સાયબર સેલ મથકે નોંધાઈ છે.
ભોગ બનનાર અતુલ કાશીદેવે પોલીસને જણાવ્યું કે, ગત ૧૦મી માર્ચે તેમના મોબાઈલ પર ટેલિકોમ રેગ્યુલેટરી ઓથોરિટીમાંથી માનવ શર્મા નામના વ્યક્તિનો ફોન આવ્યો હતો. તેણે જણાવ્યું કે, મહારાષ્ટ્રમાંથી તમારા નામે ઇસ્યુ થયેલા સીમકાર્ડનો ગેરકાયદે પ્રવૃત્તિઓમાં ઉપયોગ થઈ રહ્યો છે, જેથી તમારે ક્રાઈમ બ્રાન્ચના અધિકારી ઇન્દ્રજીત રાણા પાસેથી ક્લિયરન્સ સર્ટિફિકેટ લેવું પડશે. જ્યારે અતુલભાઈએ ઇન્દ્રજીત સાથે વાત કરી ત્યારે તેણે ડરાવી-ધમકાવીને તેમના અન્ય બેંક ખાતાની વિગતો મેળવી લીધી હતી. ત્યારબાદ આ કેસમાં સીબીઆઈના નામે વિજય પ્રકાશ નામના વ્યક્તિની એન્ટ્રી થઈ હતી. તેણે અતુલભાઈને ધમકાવતા કહ્યું કે, નરેશ રોયલ નામના ગુનેગારે તમારા નામે બેંક એકાઉન્ટ ખોલાવીને ૫૩૮ કરોડના ગેરકાયદે વ્યવહારો કર્યા છે અને અલગ-અલગ ૨૪૨ બેંક ખાતા ખોલ્યા છે. આ કૌભાંડમાં કમિશન પેટે તમને પણ ૨૫ લાખ મળ્યા છે.
ઠગોએ સ્કાઇપ કે વીડિયો કોલ મારફતે અતુલભાઈને નકલી એફઆઈઆર, સીબીઆઈ અને સુપ્રીમ કોર્ટની બોગસ નોટિસો મોકલી હતી. તેમણે ધમકી આપી હતી કે જો તેઓ સહકાર નહીં આપે તો તેમને ૭ વર્ષની જેલ થશે અને સમાજમાં તેમની આબરૂ ધૂળમાં મળી જશે. કોર્ટ કાર્યવાહી અને પ્રોપર્ટી ઇન્સ્પેક્શનના નામે તેમને ઘરમાં જ ‘ડિજિટલ એરેસ્ટ’ કરી દેવાયા હતા.
ઠગોએ અતુલભાઈ પર પૂરતો સાયકોલોજિકલ પ્રેશર બનાવ્યો હતો. તેમને ઘરના બારી-બારણાં બંધ રાખવા, પત્નીને પણ સાથે બેસાડી રાખવા અને કામવાળી કે અન્ય કોઈ પણ સગા-સંબંધીને આ અંગે વાત ન કરવા કડક સૂચના આપી હતી. એટલું જ નહીં, દર બે કલાકે વીડિયો કોલ કરીને પોતાની હાજરી પુરાવવાનો પણ આદેશ આપ્યો હતો. ડરના માર્યા નિવૃત્ત અધિકારીએ પોતાની તમામ બેંક એફડી અને સેવિંગ્સ એકાઉન્ટમાંથી કુલ ૧.૫૯ કરોડ ઠગોના ખાતામાં ટ્રાન્સફર કરી દીધા હતા.
જ્યારે અતુલભાઈ વધુ રકમ ઉપાડવા અને એફડી તોડવા બેંક પહોંચ્યા, ત્યારે બેંક સત્તાવાળાઓને શંકા ગઈ હતી. તેમણે તાત્કાલિક અતુલભાઈની પુત્રીને આ શંકાસ્પદ વ્યવહારોની જાણ કરી. પુત્રીએ જ્યારે પિતાને ફોન કર્યો ત્યારે પિતાએ પોતે ડિજિટલ એરેસ્ટ હોવાનું જણાવ્યું હતું. પુત્રી તરત જ સમજી ગઈ કે આ એક મોટું ફ્રોડ છે અને તેણે તાત્કાલિક સાયબર સેલનો સંપર્ક કર્યો હતો. સાયબર સેલની ત્વરિત કાર્યવાહીને કારણે બેંક એકાઉન્ટ હોલ્ડ થતાં કોર્ટ મારફતે ૧૧.૩૬ લાખ પરત મેળવવામાં સફળતા મળી છે. હાલ સાયબર ક્રાઈમ પોલીસે ગુનો નોંધીને તપાસના ચક્રો ગતિમાન કર્યા છે.
