Vadodara,તા.30
તારા ગાલ પર કંઇક ચોંટ્યું છે તેમ જણાવી 12 વર્ષની સગીરાનો હાથ ખેંચી તેના ગાલ પર કિસ કરનારા આરોપીને પોક્સો એક્ટ હેઠળ કસુરવાર ઠેરવી કોર્ટે ત્રણ વર્ષની સખ્ત કેદની સજા ફટકારી હતી. જજે સગીરાને વળતર પેટે રૂ. 50,000 ચૂકવવાનો પણ આદેશ કર્યો હતો.
કેસની વિગત એવી છે કે, 25 એપ્રિલ 2025ના રોજ 12 વર્ષની સગીરા વડોદરા ખાતે વાઘોડીયા રોડ પર આવેલા એક મકાનના ધાબા પર હતી ત્યારે મૂળ રાજસ્થાનના આરોપી રાહુલ નંદકિશોર દસલાણીયાએ ગાલ પર કંઈક ચોંટ્યું હોવાનું કહી તેને પાસે બોલાવી હતી. આરોપીએ સગીરાનો હાથ ખેંચી હોઠ પર કિસ કરી છેડતી કરી હતી.
આ બનાવ અંગે સગીરાની માતા પૂછવા જતાં આરોપીએ ગાળાગાળી કરી ઝઘડો કરતા પોલીસે આરોપી વિરુદ્ધ પોક્સો સહિતની કલમ હેઠળ ગુનો દાખલ કર્યો હતો. આ અંગેનો કેસ અદાલતમાં ચાલી જતાં તેમાં સરકારી વકીલ એન.યુ. મકવાણાએ દલીલો કરી હતી કે સગીરા, તેની માતા અને માસીના મૌખિક પુરાવાઓથી ગુનો સાબિત થાય છે અને નરાધમ સામે કડક પગલાં અનિવાર્ય છે.
વડોદરાના અધિક સેશન્સ જજે બંને પક્ષની દલીલ તેમજ પુરાવાને ધ્યાન લઇ આરોપીને દોષિત ઠેરવી 3 વર્ષની સખત કેદની સજા અને રૂ. 15,000નો દંડ કર્યો હતો.ન્યાયાધીશે આ બનાવના કારણે સગીરાને ગંંભીર માનસિક યાતના ભોગવવી પડી હોઇ વળતર પેટે રૂ. 50,000 ચૂકવવાનો પણ આદેશ કર્યો હતો.
