મોબાઇલની લાઇટમાં રમતા જુગારી પાસેથી રૃ.૭૧ હજારનો મુદ્દામાલ જપ્ત, મહિલાઓની ધરપકડ બાકી
Bhavnagar,તા.30
શહેર અને ગ્રામ્ય વિસ્તારમાં દારૃ-જુગારની પ્રવૃત્તિઓ નાબૂદ કરવાની કડક સૂચના અન્વયે ભાવનગર લોકલ ક્રાઇમ બ્રાંચે બાતમીના આધારે અધેવાડા ગામમાં સફળ રેઇડ પાડી છે. ગત મોડી રાત્રે પેટ્રોલિંગ દરમિયાન માહિતી મળી હતી કે, અધેવાડા ગામમાં રઘુકુળ પાર્ટી પ્લોટ પાછળ ખુલ્લા ખેતર નજીક નળમાં કેટલાક મહિલા-પુરુષો મોબાઇલની લાઇટે ગંજીપત્તાનો જુગાર રમી રહ્યા છે.
પોલીસે બાતમીવાળા સ્થળે ઓચિંતો દરોડો પાડતા ગોળ કુંડાળું વળી જુગાર રમતા ૮ પુરુષો અને ૭ મહિલાઓ સહિત કુલ ૧૫ વ્યક્તિઓ રંગેહાથ ઝડપાઇ ગયા હતા. પોલીસે ઘટનાસ્થળેથી રૃ.૬૦,૭૮૦ની રોકડ રકમ અને રૃ.૧૧,૦૦૦ની કિંમતના ૩ મોબાઇલ ફોન મળી કુલ રૃ. ૭૧,૭૮૦નો મુદ્દામાલ કબ્જે કર્યો છે. આ અંગે તમામ લોકો વિરુદ્ધ ભરતનગર પોલીસ સ્ટેશનમાં જુગાર પ્રતિબંધક ધારા હેઠળ ગુનો નોંધવામાં આવ્યો છે. કાયદાકીય જોગવાઈઓ મુજબ હાલ તમામ ૭ મહિલાઓની ધરપકડ કરવાની બાકી હોવાનું પોલીસે જણાવ્યું હતું.
