વૃદ્ધના એકાઉન્ટમાંથી રૂપિયા ૫૦ હજાર કપાઈ ગયા હોવાનો મેસેજ જોતા તાત્કાલિક બેંકમાં પહોંચ્યા હતા
Ahmedabad, તા.૮
શહેરમાં એકલદોકલ વૃદ્ધ એટીએમમાં રૂપિયા લેવા જતા હોય તેવા લોકોને ટાર્ગેટ કરીને મદદ કરવાના બહાને એટીએમ કાર્ડ બદલીને વૃદ્ધને બનાવટી કાર્ડ આપીને ઓરીજીનલ કાર્ડ વડે રૂપિયા ઉપાડી લેવામાં આવતા હોવાનો કિસ્સો શહેરના ઈસનપુર વિસ્તારમાં બન્યો છે. વિશાલનગરમાં રહેતા અને ખાનગી કંપનીમાં કામ કરતા વૃદ્ધ એટીએમમાં રૂપિયા ઉપાડવા ગયા અને પાછળ ઉભેલા શખ્સે વૃદ્ધને મદદ કરવાના બહાને એટીએમ બદલી નાખ્યું અને વૃદ્ધના એકાઉન્ટમાંથી રૂ.૮૦ હજાર ઉપાડી લીધા હતા. આ મામલે વૃદ્ધે ઇસનપુર પોલીસમાં ફરિયાદ નોંધાવી છે.ઇસનપુરના વિશાલનગરમાં રહેતા ૬૩ વર્ષીય વૃદ્ધ રાજેશ કુમાર કાછિયા વટવામાં ખાનગી કંપનીમાં નોકરી કરે છે. ગત ૨૩ ફેબ્રુઆરીની સવારે વૃદ્ધ ગોવિંદવાડી નજીક એક્સિસ બેંકના એટીએમમાં પગાર ઉપાડવા ગયા હતા. વૃદ્ધે રૂ. ૧૦ હજાર ઉપાડ્યા પરંતુ કાર્ડ બહાર આવતા સમય લાગતો હોવાથી પાછળ ઉભેલા શખ્સે વૃદ્ધને મદદ કરવાના બહાને તેમનું કાર્ડ લઈને વૃદ્ધને બીજું કાર્ડ પધરાવી દીધું હતું. વૃદ્ધ ઘરે પહોંચ્યા અને ઓફિસ જવા રવાના થઇ ગયા હતા. આ દરમિયાનમાં વૃદ્ધના મોબાઈલમાં રૂ.૩૦ હજાર કપાયા હોવાનો મેસેજ આવ્યો હતો. વૃદ્ધે તેના સાથી કર્મીઓને આ મામલે વાત કરતાં કાર્ડ બંધ કરવા માટે પ્રોસેસ શરૂ કરી હતી પરંતુ કારણોસર વૃદ્ધનું એટીએમ બ્લોક થઇ શક્યું નહી. બીજા દિવસે વૃદ્ધના એકાઉન્ટમાંથી બીજા રૂ.૫૦ હજાર કપાઈ ગયા હોવાનો મેસેજ જોતા તાત્કાલિક બેંકમાં પહોંચ્યા હતા. જ્યાં જાણવા મળ્યું કે તેમની પાસે જે એટીએમ કાર્ડ છે તે બનાવટી એટીએમ કાર્ડ છે. તેના એકાઉન્ટમાંથી કુલ રૂ.૮૦ હજાર કપાઈ ગયા છે. આખરે બેંકની મદદથી વૃદ્ધે એટીએમ કાર્ડ બંધ કરાવી દીધું હતું. આ મામલે ઇસનપુર પોલીસમાં અજાણ્યા શખ્સ સામે ફરિયાદ નોંધાવતા પોલીસે એટીએમ સેન્ટરના તથા આસપાસના સીસીટીવી ફૂટેજ મેળવી આરોપીનું પગેરું મેળવવાના પ્રયાસ શરૂ કર્યા છે.
