Ahmedabad,તા.18
રામોલ વિસ્તારમાં રહેતી અને મહિનાથી એરપોર્ટ ઉપર ફૂડ કોર્ટમાં નોકરી કરતી 25 વર્ષની નસરીનબાનું અંસારીની ગઈકાલે એરપોર્ટ વિસ્તારમાં હાસોલ પોલીસ ચોકી સામે આવેલી તંદુર હોટલમાંથી હત્યા કરેલી હાલતમાં લાશ મળી હતી. આ કેસમાં ક્રાઇમ બ્રાંચે બાપુનગર ઠક્કરનગર પાસે દ્વારકેશ સોસાયટીમાં રહેતા ચિંતન વાઘેલાની આણંદ પાસેથી ધરપકડ કરી હતી.
એરપોર્ટ ઉપર ફૂડ કોર્ટમાં નોકરી કરતી યુવતીની લાશ હાંસોલ પોલીસ ચોકી સામેની તંદૂર હોટેલમાંથી મળી હતી. પોલીસે આણંદથી આરોપીની ધરપકડ કરી હતી. પોલીસ તપાસમાં સામે આવ્યું કે, યુવક અને યુવતી વચ્ચે પ્રેમ સંબંધ હતો. પ્રેમિકાએ આપેલા 50 હજાર રૂપિયા પાછા માંગતા બંને વચ્ચે તકરાર થઈ હતી જેને લઈને પ્રેમીએ ગળું દબાવીને પ્રેમિકાની હત્યા કરી હોવાનું ક્રાઈમ બ્રાન્ચ પીઆઈ ડી.વી. ઢોલાએ જણાવ્યું હતું. પોલીસ તપાસમાં આરોપી હત્યા કર્યા બાદ નાસી ગયો હતો અને આપઘાત કરવાનો પ્રયાસ કરતાં પહેલા પોલીસે તેને પકડી પાડ્યો હતો. આરોપી મૃતક યુવતીને બેન્કનુ લોન ડેટા એન્ટ્રીનું કામ કમિશનથી આપતો હતો ત્યારે બંને વચ્ચે પ્રેમ સંબંધ બંધાયો હતો. ડેટા એન્ટ્રીના રૂપિયા બેન્ક પાસેથી આરોપીએ ત્રણ લાખ લઈ લીધા હતાં. જે પૈકી બે લાખ મૃતકને લેવાના નીકળતા હતા જે રૂપિયા આરોપી આપતો ન હતો. બીજીતરફ મૃતક પાસેથી ઉછીના લીધેલા 50 હજાર રૂપિયા આપવાના બહાને આરોપીએ તેને હોટેલમાં બોલાવી હતી અને રૂપિયાની માંગણી કરતાં તકરાર થતાં આરોપી ગળુ દબાવીને હત્યા કરીને નાસી ગયો હતો.
