Ahmedabad,તા.28
અમદાવાદમાં પાલતુ કૂતરાં રાખવા ટૂંક સમયમાં જ નવી પોલીસીનો અમલ કરવામાં આવશે. હાલમાં પાલતુ કૂતરાં રાખવા માટે રજિસ્ટ્રેશન કરવા પ્રતિ કૂતરાં રુપિયા ૨૦૦ ચાર્જ લેવાય છે.આ ચાર્જમાં વધારો કરાશે. ડોગ ઓનરને ડોગનું સમયાંતરે મેડીકલ ચેકઅપ કરાવવુ પડશે. પાલતુ કૂતરાં રાખવા માટે પોલીસીમાં જેટલી જગ્યા નકકી કરવામાં આવે એટલી જગ્યા ડોગ માટે ડોગ ઓનરે રાખવી પડશે.આ અંગેની ગાઈડલાઈન મ્યુનિસિપલ કોર્પોરેશન દ્વારા બહાર પાડવામાં આવશે.
અમદાવાદના હાથીજણ વિસ્તારમાં રોટવીલર ડોગ દ્વારા બાળકી ઉપર હૂમલો કરાતા તેનુ મોત નીપજયુ હતુ. આ ઘટના પછી મ્યુનિસિપલ કોર્પોરેશન દ્વારા ડોગ ઓનર્સ માટે વેબિનારનુ આયોજન કરવા નિર્ણય કરાયો છે.જેમાં પેટ ડોગ ઓનર્સને નિષ્ણાતો દ્વારા પેટ ડોગ ઓનર્સને વિનામૂલ્યે ડોગ બિહેવીયર અંગે માર્ગદર્શન આપવામાં આવશે.આ સાથે જ આગામી દિવસોમાં અમદાવાદમાં પાલતુ કૂતરાં રાખવા માટે નવી પોલીસી અમલમાં મુકવા તંત્ર તરફથી તૈયારી શરુ કરાઈ છે. નવી પોલીસીમાં પાલતુ કૂતરાં રાખવા માટે તેના માલિકને ડોગ બિહેવીયર અંગે જરુરી જ્ઞાન હોવુ જરુરી બનાવાશે.પેટ ડોગને વેકિસનેશન કરાવવુ પડશે.દર ત્રણ મહિને તેનુ મેડીકલ ચેકઅપ કરાવવુ પડશે.કોઈ વ્યકિતને ઈજા ના પહોંચાડે એ બાબતની તકેદારી માલિકે રાખવી પડશે. આ પ્રકારની વિવિધ મુદ્દાઓનો સમાવેશ નવી પોલીસીમાં કરી આગામી સમયમાં સ્ટેન્ડિંગ કમિટીની મંજૂરી મેળવી તેનો અમલ કરાવવામાં આવશે.
હાથીજણમાં બનેલી ઘટના પછી પકડાયેલા રોટવીલરના બિહેવીયર અને મેડીકલ પરિક્ષણ મ્યુનિસિપલ કોર્પોરેશન દ્વારા કરાયા હતા. બિહેવીયરને લઈ કરવામાં આવેલા પરિક્ષણમાં આ ડોગ લાકડી જોઈ એગ્રેસિવ થઈ જતો હોવાનુ સામે આવ્યુ હતુ.સી.એન.સી.ડી.વિભાગના વડા નરેશ રાજપુતે કહયુ,આ ડોગના ઓનર પાસે ડોગ બિહેવીયરને લઈ જરુરી જ્ઞાન નહતુ,તેમજ તેને મેડીકલ ટ્રીટમેન્ટ પણ આપવામા આવતી નહોતી.આ બાબતને જોતા દરેક પેટ ડોગ ઓનર્સને આ પ્રકારની તાલિમ આપવામા આવશે.
અમદાવાદમાં ૧૨ હજારથી વધુ પાલતુ કૂતરાંનુ રજિસ્ટ્રેશન કરાયું
મ્યુનિસિપલ કોર્પોરેશન દ્વારા ૧ જાન્યુઆરી-૨૫થી શહેરમાં પાલતુ કૂતરાં રાખવા રજિસ્ટ્રેશન કરાવવુ ફરજિયાત બનાવાયુ છે. શહેરમાં ૫૦ હજારથી વધુ પાલતુ કૂતરાં હોવાનો અંદાજ છે. જેની સામે ૨૭ મે સુધીમાં ૧૦૭૦૨ પેટ ડોગ ઓનર્સ દ્વારા ૧૨૦૮૩ ડોગનુ રજિસ્ટ્રેશન કરાવવામાં આવ્યુ છે.
કઈ પ્રજાતિના કૂતરાંનુ સૌથી વધુ રજિસ્ટ્રેશન કરાયું?
પ્રજાતિ કૂતરાંની સંખ્યા
લેબ્રાડોર રીટ્રીવર ૩૦૫૪
ગોલ્ડન રીટ્રીવર ૧૧૬૯
જર્મન શેફર્ડ ૧૧૬૬
શિહત્ઝૂ ૧૦૪૯
બીગલ ૪૭૨
સાઈબેરીયન હસ્કી ૩૩૨
પોમેરીયન ૭૫૯
રોટવીલર ૨૯૨
ડોબરમેન ૧૫૭
